MASMUR 46 - BIBEL JAMITA NA DENGGAN

Didongani jana diurupi Debata do hita

¹ Debata do pangondianta dohot gogonta, sai na rade do Ia mangurupi muda ro hasusaan.

² Gabe nada mabiar hita, haru pe humutur portibi on, dohot angka dolok marbonoman tu tandolan ni laut.

³ Haru pe mangarintiki jana margalumbang laut, jana humutur angka dolok dibaen panondongna.

⁴ Adong do batang aek na pajopkon roha ni Kota Ni Debata, inganan ni Debata Na Gumincat.

⁵ Disi do mian Debata, jana indangkan na ra sego kota i, dilehen Ia do pangurupion di habibincar ni mataniari.

⁶ Mangaronggur Debata, gabe malantuk ma portibi on, gaor ma angka bangso, mardabuan ma angka harajaon.

⁷ Didongani Tuhan Na Markuaso i do hita, diondihon Debata ni si Jakob do hita.

⁸ Tole bo, ligi ma na nikarejohon ni Tuhan; hahomangan ma da karejo ni tanganNia di tano on!

⁹ Diantak Ia do parporangan di tano on sudena, diropuk Ia angka parkokas ni porang jana ditutungi Ia.

¹⁰ Didok Ia, “Boto hamu ma, Au do Debata, ulang be pupu na marporang. Di tonga-tonga ni angka bangso, godang do Au, godang di sude tano on.”

¹¹ Didongani Tuhan Na Markuaso i do hita, Debata ni si Jakob do mangondihon hita.