MASMUR 45 - BIBEL JAMITA NA DENGGAN

Ende di parbagason ni raja

¹ Dituturi angka hata na denggan do au; hupatomu-tomu do ende on di raja. Tarsongon pulpen panggurit ni sada panyurat na somal marhata madung singkop dilangku pajojor umpama.

² Sian sandok na margoar jolma, raja i do na jumogi, gok na denggan do angka hata ni raja i, angke antong sai na hot do Debata mamasumasu di raja i.

³ Solotkon bo podang di gonting, o raja ulubalang, na tongam ma da raja i jana marmulia!

⁴ Maju ma da mardongan sahala manuju habonggalan marayakkon hajojongjong ni hatigoran dohot uhum. Gogo ni raja i ma da padumpangkon hamonangan na marbungaran.

⁵ Pana ni raja i tajom do mamantik tu pusu-pusu ni musu, martungkapan angka bangso di jolo ni patmu.

⁶ Markite-hite uhum diparenta raja i rayat, hot do habangsa harajaan na nipasahat ni Debata.

⁷ Dihaholongi raja i do na tigor jana manghasogohon na jat, hara ni i ma umbaen na raja i ditodo Debata. Dipasuksuk Ia tua di raja i manyalpui angka raja na asing i.

⁸ Maradu huskus noma pakean ni raja i songon mur, gaharu dohot cendana. Di bagasan bagas godang na margading sigodang arga, laing marjop ni roha raja i dibaen angka parendena.

⁹ Di tonga-tonga ni angka dadaboru parkobas di bagas godang adong muse do disi angka boru ni raja. Di siamun ni habangsa i jongjong na mora na duma mamake barang sere na pita.

¹⁰ O ale boru ni raja, bege jolo hatangku, halupahon ma bangsomu dohot ale-alemu.

¹¹ Hajogian ni rupamu mambaen tartarik roha ni raja i, ia do tuanmu, oloi ma i.

¹² Maroban silua somba-somba do halak Tirus mambuat roha do tu ho halak paradongan.

¹³ Boru ni raja na jogi i masuk tu bagasan bagas godang, dohot baju na marsulam bonang sere.

¹⁴ Marpakean na marragam tompa, na nidonganan marbaris tu adopan ni raja, di dongani angka boru parkobasna; halahi pe laing dohot mangadop tu habangsa ni raja.

¹⁵ Olo da, moga na i antong halahi di na masuk tu bagas godang ni raja i!

¹⁶ Bahat ma da muse anak ni raja i, na laho manjuguki habangsa ni ompu ni raja i. Baenon ni raja i ma gabe parkuaso halahi, laho mamarenta sude portibi.

¹⁷ Endehononkon ma jana pabonggalkonon ma goar ni raja i, jana salolot-lolotna ma angka bangso mamuji raja i.