MASMUR 44 - BIBEL JAMITA NA DENGGAN

Tangiang mangido pangondingan

¹ Hami bege sandiri do, ale Debata, holong ni roha na nibaritahon ni ompunami, taringot tu hagodangan ni karejo na nipatulusMu di hatiha na salpu di na robi.

² Ho sandiri do paorotkon angka bangso anso hot bangsoMi di tano ni halahi. Diago Ho do angka bangso na asing i, hape anggo bangsoMi dipadiar Ho do mamopari.

³ Diingani halahi pe tano i nada i hara ni podang; nada hara ni gogona sandiri halahi umbaen na monang, tapi hara ni kuaso dohot sinondang ni bohiMu, na patandahon holong ni rohaMu maradopkon bangsoMu.

⁴ Ho do Debatangku dohot Rajangku, na mangalehen hamonangan di si Jakob.

⁵ Markite-hite kuasoMu, hami taluhon musunami, jana hami patunduk bangso na mamorangi hami.

⁶ Angke nada anak ni siornami na hami pangasahon, nada tarlehen podangnami hamonangan di hami.

⁷ Tapi Ho do na paluahon hami sian musunami; madung ditaluhon Ho angka halak na manghosomi hami.

⁸ Jadi sai tongtong noma pujionnami Ho, jana torus ma hami mandok tarimakasi tu Ho.

⁹ Hape saonnari ditadingkon Ho do hami, dipadiar Ho hami ditaluhon halahi. Nada be Ho maju rap dohot hami.

¹⁰ Dipadiar Ho do hami maporus sian musu na mangarampas artanami.

¹¹ Dipadiar Ho do hami dibante songon biri-biri, disarsarkon Ho do hami di tonga-tonga ni angka bangso.

¹² Digadis Ho ma bangsoMi, argana pe so sadia, songon na so adong astuan ni halahi bagi na aha.

¹³ Diida hombarnami do na nibaenMu tu hami, dipacia-cia jana dipartatai halahi ma hami.

¹⁴ Dibaen Ho do hami gabe siincahan ni angka bangso, mopeng-openg ma ulu ni halahi lalu mangurkai.

¹⁵ Disonggaki do hami sasadari, mananggung hahaila dohot na so marbohi,

¹⁶ pabege-begehon incak dohot habilean sian pamangan ni musu dohot sian na marhosoman.

¹⁷ I ma sude na dondon tu hami haru pe tu Ho nada lupa rohanami. Hami pe nada soadahononnami parjanjian na nibaenMi dohot hami.

¹⁸ Nada rohanami mansoadahon Ho nada hami alo parenta na sian Ho.

¹⁹ Hape ditadingkon Ho do hami di bagasan hagolapan, na so margeldok di tonga-tonga ni binatang harangan.

²⁰ Sugari nian hami na so marsomba be tu Ho Debatanami, tapi martangiang tu angka debata,

²¹ pasti diboto Ho do i, angke didodo Ho do sibunian ni roha.

²² Hara ni Ho sai torus do hami tarancam mate, jana dibaen songon biri-biri sisambolon.

²³ Ngot ma Ho! Biasi sai modom Ho, ale Tuhan? Jongjong ma Ho! Ulang tulak hami sapanjang.

²⁴ Biasi ma martabuni Ho, jana dihalupahon Ho sitaonon dohot hasusaannami on?

²⁵ Sarge do hami sude di tano, payak di abuan hara ni na talu.

²⁶ Ro ma da Ho mangurupi hami, palua ma hami, angke manongtong do holong ni rohaMi.