MASMUR 37 - BIBEL JAMITA NA DENGGAN

Bagian ni halak na jahat dohot halak na burju

¹ Ulang pola marsak ho hara ni halak na jungkat, ulang mangiburu ho mida halak sibaen na jahat.

² Angke songon ruput na mahiang, tibu ma mago halahi; songon suan-suanan na malos marmatean noma i.

³ Haporsayai ma Tuhan jana baen ma na denggan, anso sonang ho di tano i maringanan.

⁴ Jalahi ma hatuaanmu di bagasan Tuhan, dilehen Ia ma por ni rohamu.

⁵ Pasahat ma ngolumu tu Tuhan, tuSia ma ho mararop roha, dumpang ma tolonganNia.

⁶ PatangkasonNia ma haburjuonmu songon na tiur, marsinondang ma hadenggananmu songon mataniari.

⁷ Pasonang ma rohamu paintehon Tuhan, sobar ma ho paima-imahon lopus dibaen Ia tindakan. Ulang mangiburu mida halak na mardohar, na mandapot hara ni na paoto-otohon.

⁸ Ulang ho dirajai muruk dohot susa ni roha, hum na pamaol-maolkon dirimu do i sudena.

⁹ Angke agohonon do sanga ise na mambaen jahat, tapi anggo na mararop roha tu Tuhan, i do nampuna tano teanan.

¹⁰ Manigor tibu do mago anggo parjahat, muda nijalahan, nada be ia haidaan.

¹¹ Halak na serep marroha, i do nampuna tano, na mangarasoi dame dohot hasonangan na tarlobi.

¹² Parjahat i martahi na jahat, jana magigi do Ia paida-ida halak na daulat.

¹³ Hape dipartatai Tuhan do parjahat i, diboto Ia do na dung donok hamamago ni halahi.

¹⁴ Manyintak podang parjahat i jana manarik sior laho mamunu na pogos dohot na dangol, laho pamatehon halak parroha sisangunjur.

¹⁵ Hape hona tiham ni podangna sandiri do parjahat i sior ni halahi i pe diponggoli.

¹⁶ Haru pe saotik sinadongan ni halak na burju, ummarga dope i sian arta ni jolma na durako.

¹⁷ Angke ponggolkonon ni Tuhan do kuaso ni parjahat, tapi lehenonNia do pangondian tu halak na tigor.

¹⁸ Dijagohon Tuhan do ngolu ni halak na daulat, halahi do nampuna pusaka i sapanjangna.

¹⁹ Di hatiha na sompit, nada hasusaan halahi, di tingki na haleon laing tuk di halahi.

²⁰ Hape na giot harom do anggo parjahat, mago boti ma halahi songon timus. Marmagoan ma angka musu ni Tuhan songon bunga na di padang-padang.

²¹ Manginjam do halak parjahat tapi nada dipaulak, hape anggo halak na burju sai basa do jana ringgas mangalehen.

²² Sanga ise na nipasupasu ni Tuhan, i do na dapotan tano, hape anggo halak na niburaanNia, usiron do i kehe.

²³ Diondihon Tuhan do sanga ise halomoan ni rohaNia, jana toguonNa do Ia di dalan ni ngoluna.

²⁴ Muda tinggang pe ia, nada jabat poran bugangnia, angke digolom Tuhan do tangannia.

²⁵ Mamungka sian haposoonku lopus matobang songon on, nada unjung dope huida halak na burju ditadingkon Tuhan, sanga pomparanna gabe pangido-ido sidoka.

²⁶ Matua na painjamkon ma i jana mangalehen, jana angka dakdanakna gabe pasupasu do i disia.

²⁷ Tadingkon ma hajahatan, patulus ma na denggan, gabe maringanan di tano i ma pomparanmu sapanjangna.

²⁸ Dibaen holong do roha ni Tuhan mida hatigoran; nada padiaronNa bangsoNa i marhancit. Sai hot do disarihon Ia halak na nihaholonganNia, hape anggo pomparan ni parjahat paorotonNia.

²⁹ Halak na daulat do nampuna tano teanan, jana manginganisa sapanjangna.

³⁰ Halak na denggan pajojor hata na marimpola sai na tigor do hata na nidokna.

³¹ Momos do di bagasan rohania aturan na sian Debatana, nada manyimbil sian i ia.

³² Anggo parjahat sai na mangintip do i tu halak na denggan, jana manjalahi haputusan laho mamunusa.

³³ Hape nada ra Tuhan pasahatkonsa tu tangan ni musuna, sanga padiarkonsa diuhumi tu pangadilan.

³⁴ Tu Tuhan ma mararop roha jana oloi ma parentaNa, gabe angkatonNia ma ho, jana baenonNia gabe nampuna di tano teanan; idaonmu ma parjahat dibaen marmorotan.

³⁵ Unjung do huida sahalak parjahat na ginjang roha, markuaso ma ia antong songon bona ni sampinur Libanon.

³⁶ Di na mamolus au, nada be adong ia hujalahi hape nada dapot au be ia.

³⁷ Parrohahon ma halak na burju roha jana partigor, halak na dame, sai adong do siarapkononna.

³⁸ Hape anggo halak pardosa dironcohon, pomparan ni halahi pe diagohon.

³⁹ Dipalua Tuhan do halak na daulat jana diondihon do halahi di hamamasa ni hasusaan.

⁴⁰ Diurupi Ia do halahi jana dipalua, paluahon halahi sian halak na jahat, angke marpangondian do halahi tuSia.