MASMUR 35 - BIBEL JAMITA NA DENGGAN

Tangiang mangido partolongan

¹ Tuhan, alo ma sanga ise na mangalo au, porangi ma sanga ise na mamorangi au.

² Buat ma parince dohot baju porangMu, jana jongjong ma Ho mangurupi au.

³ Buat ma hujur dohot tungkotMu laho mangalo halak na mangkojar au. Dok ma tu au, paboa na Ho do Sipalua di au.

⁴ Ho ma padiarkon talu dohot pailahon sanga ise halak na giot mamunu au. Padiar ma kehe boti so martontu halak na martahi mangalo au.

⁵ Padiar ma diburu Surusuruan Ni Tuhan halahi songon lapung hiap na niombus ni alogo.

⁶ Padiar ma dikojar Surusuruan Ni Tuhan halahi, di dalan na golap jana na landit.

⁷ So adong harana manaon jorgong halahi tu au, dohot mambaen godung na bagas padapotkon au.

⁸ Padiar ma halahi didondoni hasegoan sian na so niambang-ambang. Padiar ma alit halahi di jorat na nibaenna sandiri jana madabu lalu mago boti.

⁹ Jadi marsurak-surak ma au hara ni Tuhan, jop ma rohangku dibaen dipalua Ia au.

¹⁰ Sian sandok rohangku hudok hatangku, “Tuhan, nada adong da tudosanMu! Diondihon Ho do na gale sian na gogo na pogos dohot na marhancit sian na manyosaksa.”

¹¹ Marsaksi do halak na jahat manudu au, salaho tu parkaro na so hupaboto-boto.

¹² Dibalos halahi do hadenggananku dohot hajahatan; bonom ma au di bagasan pandelean.

¹³ Dompak marnyae halahi, marsak do au jana nada mangan, martangiang au lalu paunduk simanjujung,

¹⁴ songon na manangiangkon dongan saama saina, sanga ale-aleniba. Mangunduk au manangisi halahi, songon na marhabot ni roha au tu dainang sandiri.

¹⁵ Hape di na marsak au, jop do roha ni halahi, jana marrongom tu au mangincak-incahi. Halak na so hutanda mambalbali au, nada marnamantak.

¹⁶ Sai torus ma halahi pacia-ciahon au, manaili ma i panyogo-nyogoon.

¹⁷ Sadia honok nari ale Tuhan, sadia honok nari Ho hum na manatap manaili? Palua ma da au sian pangaroro ni halahi palua ma hosangku sian angka singa i.

¹⁸ Jadi mandok tarimakasi ma au di tonga-tonga ni bangsoMu, jana di parlagutan ni halahi pujionku ma goarMu.

¹⁹ Ulang padiar au dipargonjakkon halak na manghosomi au di na so adong dalanna. Ulang padiar au disurak-surahi halak na manghasogohon au so adong dalanna.

²⁰ Nada pade pangkataion ni halahi; halak na mangkaholongi dame pe ditilakoi.

²¹ Dipasala halahi do au jana pio-pio paboa na dung tardapot di halahi pangalahongku.

²² Tapi diboto Ho do sudena i, ale Tuhan, ulang be Ho sai mandao-dao jana sai hohom.

²³ Jongjong ma Ho mangampini parkarongku, o ale Debatangku jana Tuhanku, urupi ma au!

²⁴ Ampini ma au, angke tigor do Ho ale Tuhan Debatangku, ulang padiar musungku marsurahi tu au.

²⁵ Ulang padiar halahi mandok di bagasan rohana, “Tuani ma da mate i! I ma tutu na nipangido ni rohanami i!”

²⁶ Padiar ma talu jana so marhatontuan sanga ise halak na sonang mida sitaononku. Padiar ma angka na gakgak i tu au marbile jana maila.

²⁷ Sai marjop ni roha ma nian sanga ise na marpor ni roha mida au nipatigor. Sai mulak-ulak ma nian didok halahi, “Na godang ma da antong Tuhan! GiotNia anso dapotan haluaan ma nian naposoNa i.”

²⁸ Jadi paboa-boaonku ma hatigoranMu, jana pujionku ma Ho sian ari tu ari.