MASMUR 34 - BIBEL JAMITA NA DENGGAN

Puji-pujian di hadengganan ni Tuhan

¹ Sai giot mandok tarimakasi do au tu Tuhan ganop ari, jana ulang mantak nian tuSia au mamuji-muji.

² Sai giot marmoga-moga do au hara ni karejoNia, anso nian dibege halak na hona sosak i jana marjop roha.

³ Pagodang ma Tuhan rap dohot au, beta ma rap hita pasangapkon goarNia.

⁴ Martangiang au, gabe dialusi Tuhan, dipalua Ia do au sian sandok sihabiaran.

⁵ Mararop roha tuSia do halak na hona sosak, marjop ni roha ma halahi jana nada maila.

⁶ Pio-pio halak na sapot bagian, dialusi Tuhan do i, jana dipaluaSa sian sasude pardangolanna.

⁷ Surusuruan Ni Tuhan manogu halak na burju marugamo, jana na paluahon halahi sian bahaya.

⁸ Ligi jana dai sandiri ma hadengganan ni Tuhan, martua ma sanga ise na maronding tuSia.

⁹ Habiari ma Tuhan, o hamu bangsoNia, sanga ise na burju mangoloi Ia nada dumpang hurangan.

¹⁰ Angka singa pe markancit hara ni na malean hape dilehen do sude na denggan anggo tu halak na manjalahi Tuhan.

¹¹ Tangihon ma, sude hamu angka dakdanak, huajari hamu pasangapkon Tuhan.

¹² Por dehe rohamunu lolot di hangoluan jana mandai hadengganan dohot hatuaan?

¹³ Ulang pardokkoni angka hata na jat, jana ulang hagioti angka gabus.

¹⁴ Padao ma ho sian na jahat, patulus ma na denggan, gogoi ma parayakkon hadamean.

¹⁵ Diparrohahon Tuhan do halak na daulat, muda pio-pio halahi, ditangihon Ia.

¹⁶ Hape anggo halak na jahat, dialo Ia; dung mate, tibu-tibu halahi lupa sian roha.

¹⁷ Muda pio-pio halak na daulat, ditangihon Tuhan, jana dipalua Ia halahi sian sandok hasusaan.

¹⁸ Donok do Tuhan tu halak na mandele, dipalua Ia do halak na manderse rohana.

¹⁹ Halak na burju, manaon bahat na hancit, tapi dipalua Tuhan do ia sian i sudena.

²⁰ Dijagohon Tuhan do sude pamatangnia, jadi sada pe sian holi-holina nada adong na maponggol.

²¹ Mate ma parjahat hara ni hajahatanna, hona uhum ma sanga ise na goyak rohana mida halak na daulat.

²² Paluaon ni Tuhan ma angka naposoNa na marpangondian tuSia indangkan na hona uhuman.