MASMUR 33 - BIBEL JAMITA NA DENGGAN

Ende puji-pujian

¹ Marsurak ma hamu di Tuhan, hamu angka na burju roha, patut do halak na daulat mamuji-muji Ia.

² Dok ma tarimakasi tu Tuhan mardongan hasapi, marende ma diSia mardongan sora ni musik.

³ Endehon ma ende na imbaru di Tuhan, denggan baen pamiltik ni hasapi i, jana marsurak ma marjop ni roha!

⁴ Haposan do sude hata na nidok ni Tuhan, tigor do Ia di sude na nibaenNia.

⁵ Dihaholongi Ia do hasintongan dohot hatigoran, gok holong ni rohaNia na manongtong i do sude portibi.

⁶ Dilehen Tuhan ma parenta, gabe adong ma langit, mataniari, bulan dohot bintang dijadihon hataNia.

⁷ Sude aek laut dipalagut Ia di sada inganan, ditahan Ia laut na bidang anso ulang jabat marlobian.

⁸ Habiari ma Tuhan, o ale na satano on! Pasangap ma Ia, o ale sandok bangso!

⁹ Angke mandok hata Ia, gabe tarjadi ma sasudena dibaen Ia parenta, gabe adong ma sasudena.

¹⁰ Disundati Tuhan do sangkap ni angka bangso, disoadahon Ia do sangkap ni halahi.

¹¹ Hape anggo sangkap ni Tuhan, laing hot do salolotna, hot do togu sangkapNia sapanjang manyahena.

¹² Martua ma bangso na mangoku Tuhan gabe Debatana, martua ma bangso na hona todo gabe bangsoNia!

¹³ Manatap do Tuhan sian banua ginjang, diida Ia ma sude jolma manusia.

¹⁴ Dipamanat-manat Tuhan do sian habangsaNia sandok na maringanan di portibi.

¹⁵ Ditopa Ia sandok pikiran ni halahi; didodo Ia sude pambaenan ni halahi.

¹⁶ Nada monang raja hara ni godang ni kuasona, nada malua ulubalang hara ni godang hagogoon.

¹⁷ Nada tarpangasahon kudo manjalahi hamonangan, nada tarbaen paluahon, halobian ni gogona.

¹⁸ Dijagohon Tuhan do sanga ise halak na burju mangoloi Ia, halak na mararop roha di holong ni rohaNa sapanjang.

¹⁹ Dipalua Ia halahi sian hamatean, jana dipangolu Ia halahi di hamamasa ni haleon.

²⁰ Jadi mararop roha tu Tuhan noma hita, Ia do pangurupi dohot na mambela hita.

²¹ Marjop ni roha do hita hara ni Ia jana porsaya tu goarNia Na Badia.

²² Sai hot ma nian holong ni rohaMu tu hami, ale Tuhan, angke tu Ho do hami marhaposan.