MASMUR 31 - BIBEL JAMITA NA DENGGAN

Mararop roha tu Tuhan

¹ Ale Tuhan marpangondian tu Ho do au, ulang loas dipaila jana lus au, hara ni hatigoranMu, sombangku, palua ma au.

² Tangihon ma tangiangku. Palua ma au manigor. Ho noma da dolok batu inganan parlinggomanku, dohot benteng na togu, inganan haluaan di au.

³ Ho do haporusanku dohot partahananku, togu-togu ma au hombar tu janjiMu.

⁴ Padao ma au sian jorgong na nitaon tu iba, linggomi ma au sian mara.

⁵ Hupasahat tu bagasan tanganMu ma tondingku, o ale Tuhan Debata na burju, na paluahon au.

⁶ Goyak do rohaMu mida halak na marsomba tu gana-ganaan, tu Tuhan do au porsaya.

⁷ Marjop ni roha ma au jana marmoga-moga, angke sai tong do holong rohaMu di iba. Diida Ho do pardangolanku jana diboto Ho do hasusaanku.

⁸ Nada dipadiar Ho au ditangkup musungku, tapi dijagohon Ho do au gabe sonang.

⁹ Ibo ma rohamu ale Tuhan, mida au, angke di bagasan hasusaan do au; maniak do matangku hara ni na sai tangis sandok gogongku madung abis.

¹⁰ Marsalpuan do ngolungku di bagasan pardangolan, marabisan ari-aringku mardongan na holsoan. Maradu marniang pamatangku hara ni sapot ni bagian, salang holi-holingki pe majabat gale.

¹¹ Bile do au dietong roha ni sude musungku, gabe siincahan ni angka hombar noma au. Tarsonggot be do angka sitandaan muda marsuo dohot iba, marlojongi halahi muda marsuo di dalan dohot iba.

¹² Songon rompak do iba dietong, jana dihalupahon songon jolma na dung nitanom.

¹³ Pangalaho na jorbut sai paayak-ayak au; hubege do hata husip ni musu martahi saroha halahi mangalo au; jana martuptup laho mambuat hosangku.

¹⁴ Tapi anggo au, laing tu Ho do ale Tuhan pos ni rohangku, angke Ho do antong Debatangku.

¹⁵ Ho do na sai tongtong pature-ture au; palua ma au sian musungku, dohot sian halak na manyosak au.

¹⁶ Sai marsinondang ma bohiMu tu naposoMu, palua ma au hara ni holong ni rohaMu.

¹⁷ Pio-pio do au tu Ho Tuhan, ulang padiar au niarsahan. Padiar ma halak na jahat dipaila, jana mijur tu inganan ni na mate so mandok hata.

¹⁸ Sumpol ma pamangan ni angka pargabus na manyombong pacia-ciahon halak na bulus.

¹⁹ Na lobi do antong hadenggananMu na nipasingkopMu di halak na mabiar tu Ho! Diboto halak do sude sanga aha na nibaenMu, tu halak na marsilaung tu Ho.

²⁰ Ditabunihon Ho do halahi di linggomanMu, maradopkon tipu akal ni parjahat. Dilinggomi Ho do halahi di inganan na sonang, maradopkon incak ni musuna.

²¹ Nipuji ma Tuhan! Dipatangkas Ia do holong ni rohaNia, na pahomang rohaniba di na nihobuk ni musu au jana dialosa.

²² Mabiar do au anggo di hatiha i jana marpikir, “Madung dipaorot Tuhan au lakna sian adopanNa.” Hape madung habegean tu Ho pangidoanku, di na pio-pio au tu adopanMu.

²³ Haholongi ma Tuhan, o hamu sude bangsoNia, dijagohon Tuhan do sanga ise na setia. Tapi siginjang roha diuhumi Ia, hombar tu pambaenanna.

²⁴ Papir jana patogu ma rohaMu, sude hamu na mararop roha tu Tuhan.