MASMUR 30 - BIBEL JAMITA NA DENGGAN

Tangiang tarimakasi

¹ Hupuji do Ho ale Tuhan, angke madung dipatongon Ho di au haluaan. Nada dipadiar Ho musungku marsurak manggorai au.

² Tu Ho do au pio-pio, ale Tuhan Debatangku, jadi gabe dipamalum Ho au.

³ Disalpuhon Ho do tanoman sian au, jana dipasuang Ho ngolungku.

⁴ Endehon ma puji-pujian di Tuhan, o hamu bangsoNia na nihaholonganNia! jana haulkon ma hatarimakasion tu goarNa Na Badia!

⁵ Angke hum santongkin sajo do muruk Tuhan, hadenggananNa do mardalan salolot iba di hangoluan. Saborngin sajo do au tangis, hape maroban hamogaan ma mataniari bincar.

⁶ Di na sonang pangkilalaan, gabe hudokkon, “Nada be iba tartaluhon!”

⁷ Angke na denggan do rohaMu tu au, ale Tuhan, diondihon Ho au songon benteng di dolok an. Hape martabuni muse Ho sian jolongku, gabe tarsonggot rohangku.

⁸ Tu Ho do au pio-pio, ale Tuhan, mangido partolongan sian Ho.

⁹ Aha ma he gunana di Ho muda mate au, aha ma untungna muda dikuburkon au? Tarbaen na mate ma he mamuji Ho dohot pajojorkon denggan ni haburjuonMu?

¹⁰ Tangihon ma tangiangku jana ibo ma rohaMu mida au. Ale Tuhan, urupi ma au.

¹¹ Dipauba Ho hadangolanku gabe tortor siriaon digonti Ho hamarsahanku dohot hamogaon.

¹² Jana nada ra be au manghasipkon; endehononku noma Ho dipamujion. O Tuhan, Ho do da Debatangku, sai mandok tarimakasi tu Ho do au salolotna.