MASMUR 22 - BIBEL JAMITA NA DENGGAN

Tangiang di hatiha hasusaan dohot ende puji-pujian

¹ Debatangku, Debatangku, biasi ditinggalkon Ho au? Pio-pio au, hape tongtong Ho dao, pangurupiMu nada jungada ro.

² Ale Debatangku, hatiha arian au pio-pio, tapi laing tongtong do hohom Ho. Hatiha borngin martangiang au, laing nada sonang rohangku.

³ Tutu do Ho Raja Na Sun Badia na maringanan di ginjang puji-pujian ni halak Israel.

⁴ Mararop roha tu Ho do ompunami, mararop roha halahi, gabe dipalua Ho do halahi.

⁵ Pio-pio halahi tu Ho jana dipalua; mararop roha halahi jana nada hirim rohana.

⁶ Nada jolma au, tapi goya do, diincahi halak jana dipacia-cia do.

⁷ Sude na marnida au mangincahi jana mangalayasi, mamursikkon dohot mangupir-upirkon ulu halahi.

⁸ Ninna halahi, “Dipangasahon ho do Tuhan; biasi nada ro Ia paluahon? Anggo jop do roha ni Tuhan mida ho, biasi nada ditolong Ia ho?”

⁹ Ho do na paruar au sian bortian, sian na menek dope au dijago Ho anso sonang.

¹⁰ Sian na menek di tanganMu do bagianku, sian di bortian ni dainang dope au, laing Ho do Debatangku.

¹¹ Madung mardonok parmaraan, ulang be Ho sai mandao ale Tuhan, angke asing sian Ho, nada adong partolongan.

¹² Songon lombu na marhulanan, musu mangarongomi au, songon lombu riar na sian Basan halahi manghaliangi au.

¹³ Rap ngangang be pamangan ni halahi mangadopi au, songon singa na marngaur giot manangkup sipolgahonna.

¹⁴ Abis ma sude gogongku, songon aek na durus tu tano, martalgangan sude holi-holingki, ate-ate i pe malala songon lilin na hona api.

¹⁵ Aru-arungku mahiang songon ngarngar, dilaniba lohot di langit-langit ni pamangan. Anggo au madung ditinggalkon Tuhan, songon halak na mate di kuburan.

¹⁶ Dihobuk punguan ni halak na jahat do au, tudos tu anjing na marudur halahi mangarongomi au, manyuak-nyuak tangan dohot patku.

¹⁷ Ma pola haidaan sude holi-holingku, songon sitontonan au diida musu.

¹⁸ Dibagi-bagi halahi do pakeanku, jana mardadu halahi hara ni baju jubangku.

¹⁹ Tapi anggo Ho ale Tuhan, ulang ma Ho mandao, manigor ompoti ma mangurupi au jolo.

²⁰ Palua ma hosangku sian podang, sian anjing panyoro palua au jolo.

²¹ Palua ma au jolma na so margogo on, sian tanduk ni lombu dohot baba ni singa.

²² Sai paboa-boaonku do pambaenanMu tu bangsoMu, di parluhut-luhutan ni halahi, papuji-pujionku do goarMu.

²³ Hamu angka na daulat marroha, puji hamu ma Ia! Ale pomparan ni si Jakob pasangap ma Ia! Ale pomparan ni Israel, marsomba ma hamu tuSia!

²⁴ Angke nada dipadiar Ia halak na niparkancitan, jana nada nayang rohaNia di pardangolanna. Nada dihudukkon Ia halahi, tapi mangalusi do Ia muda pio-pio halahi tuSia.

²⁵ Pujionku ma Tuhan di tonga ni punguan ni bangso i, hara ni sude angka na dung dibaen Ia. Di adopan ni umat i na manghabiari Tuhan, huhaulkon haul na hujanjihon.

²⁶ Marmanganan ma halak na pogos lopus butongan, halak na manjalahi Tuhan, pujionna ma Ia. Sai anggiat ma halahi tongtong sonang ro di salolot-lolotna.

²⁷ Ingoton ni sude bangso ma Tuhan, sian desa na walu halahi marroan, sude horong ni bangso mulak ma tuSia, lalu marsomba tuSia.

²⁸ Angke Tuhan do raja na markuaso, Ia do mamarenta angka bangso.

²⁹ Sude halak na jungkat marsomba ma tuSia, sandok bangso ni jolma mangunduk ma tuSia.

³⁰ Oloan ni angka sundut na mangihut tu Tuhan, marsundut-sundut Ia baritahononna.

³¹ Tu bangso na umpudi tubu paboaonna do barita, “Madung dipalua Tuhan bangsoNia.”