MASMUR 20 - BIBEL JAMITA NA DENGGAN

Tangiang mangido hamonangan

¹ Sai dialusi Tuhan ma ho dihatiha hasusaan, sai Debata ni si Jakob ma mangalehen di ho parondingan.

² Sai ditongos Ia ma sian BagasNa pangurupion, jana dilehen Ia panolongi sian Dolok Sion.

³ Sai dijagit Ia ma sude haul na nilehenmu, jana jop ma rohaNia di haul na nitutungmu.

⁴ Sai digohi Ia ma na nihalungunkonmu, jana sai manjadi ma dibaen Ia sangkapmu.

⁵ Jadi marsurak ma hami marjop ni roha, lalu mamestahon hamonanganmu, bope mamuji goar ni Debata. Tuhan ma na patuluskon sude pangidoanmi.

⁶ Saonnari, huboto Tuhan do hape mangalehen hamonangan di raja na nipiliNia. Dilehen Tuhan alusna sian banua ginjang; dapotan hamonangan godang raja i hara ni Tuhan Na Markuaso.

⁷ Adong do halak na mangasahon kareta porangna, adong muse na mangasahon kudona. Tapi nada songon i anggo hita; hita marsitiopan tu kuaso ni Tuhan, Debatanta.

⁸ Tartuktuk ma halahi jana tinggang, tapi anggo hita jongjong do jana hot.

⁹ Ale Tuhan, lehen ma hamonangan tu raja, alusi ma hami muda martangiang.