MASMUR 19 - BIBEL JAMITA NA DENGGAN

Hagodangan ni Tuhan di tonga-tonga ni jadi-jadianNa bope di bagasan tonaNia di tonga-tonga ni jadi-jadianNa

¹ Dibaritahon langit do hamuliaan ni Debata, jana dipaboahon awang-awang i do karejo ni tanganNa.

² Ari na sada pabolkaskon tu ari na di pudina, borngin na sada paboahon tu angka udutna.

³ Nada adong mangkuling sanga hata sibegeon, nada adong sora sitangkupon ni pinggolniba.

⁴ Hape sorana marsaringar tu sude portibi, tarbege lalu tu ujung ni tano i. Di awang-awang dibaen Tuhan bagas ni mataniari,

⁵ manyogot i bincar ia songon pangoli na martua, songon pahlawan na giot mardalani.

⁶ Dibolus ia langit i sian ujung tu ujung, nada adong na onding sian milasna na manutung.

Tona Ni Tuhan

⁷ Sanggam do Tona Ni Tuhan, pasonang rohaniba. Haposan do parenta ni Tuhan, mambaen marbisuk halak na lidang.

⁸ Tumbuk do paraturan ni Tuhan i, pasonangkon roha ni sipangoloi. Polin do na niputuskon ni Tuhan i, mambaen jolma i mangastui.

⁹ Dumenggan ma na marsomba tu Tuhan, jana tongtong ma i nikarejoan. Haposan do Tona Ni Tuhan jana salolotna do marhatigoran.

¹⁰ Ummarga sian sere na polin do Tona Ni Tuhan tumonggi do i sian manisan.

¹¹ Dung i muse naposoMi diajari ia, upa na godang tu na mangoloi dipasingkop ia.

¹² O, Tuhan nada adong na umboto hasalaanna sandiri, antong palua ma au sian hasalaan na buni.

¹³ Padao ma au sian dosa na nisangajo, ulang padiar au dikuasoi. Jadi gabe jolma na sun denggan ma iba, jana malua sian hajahatan ni dosa.

¹⁴ Sai jagit ma pikiran dohot hatangku, o Tuhan, panjago bope sipalua di au.