MASMUR 18 - BIBEL JAMITA NA DENGGAN

Ende hamonangan ni si Daud

¹ Tuhan, Ho do haholongan ni rohangku, Ho do haroroan ni hagogoan di au.

² Tuhan do parondinganku, benteng na togu di au. Tu Debata do au marsilaung, gabe sonang au marlindung. Songon parince digupgupi Ia au, dijago Ia au tongtong anso sai sonang au.

³ Pio-pio ma au tu Tuhan na patut sipasangapon. Jadi malua ma au sian angka musungku.

⁴ Mara hamatean manghaliangi au ombak parmaraan mangaliputi au.

⁵ Manaon jorgong hamatean tu au, ngangang kuburan i di jolongku.

⁶ Di na tarsosak au hupiohon Tuhan, mangkuling tu Debata mangido partolongan. Sian BagasNa do Tuhan manangihon, dibege Ia sorangku mangido pangurupion.

⁷ Dung i humutur ma tano bope bona ni dolok humutur, harana muruk ni Debata madung gurgur.

⁸ Haruar timus sian lubang ni igungNa, api dohot banggar haruar sian pamanganNa.

⁹ Dibola Ia langit dung i mijur ma Ia, dohot ombun na golap di toru ni patNa.

¹⁰ Juguk ma Ia di ginjang ni kerub jana habang, habang di ginjang ni habong ni alogo.

¹¹ Dibaen Ia ma hagolapan di humaliangNa baen parsitabunianNa, ombun na dokdok jana na hapal ma baen ingananNa.

¹² Hara ni sinondang na di joloNa i, mago ma angka ombun, ambolas dohot banggar ni api.

¹³ Dung i mangaronggur ma sora ni Tuhan sian ingananNa, Na Di Banua Ginjang i patubegehon soraNa.

¹⁴ Dipalua Ia panaNia, musu i pe kehe gumadobur, maporus halahi hatiha manyoro ronggur.

¹⁵ Tandolan ni laut tarida, sisik ni tano tarbuka tangkas, di na manyonggak Tuhan tu musu mardongan rimas.

¹⁶ Sian ginjang disurduhon Tuhan tanganNa tu au, sian aek na bagas ditarik Ia au.

¹⁷ Ia palua au sian musu na gogo, sian sude na manghagigihon au na mambaen au nada margogo.

¹⁸ Dialo halahi au dompak di hasusaan, tapi dilehen Tuhan do di au paronding-ondingan.

¹⁹ Dipalua Ia do au sian parmaraan, angke dibaen Ia au gabe haholongan.

²⁰ Dibalos Tuhan tu au, angke giotNia do antong nipambaenan, dipasupasu Ia au angke nada hubaen hasalaan.

²¹ Madung hupatulus parenta ni Tuhan, jana nada jungada marbalik au sian Debatangku.

²² Sude tonaNia madung huparrohahon, parentaNia nada adong na hulupahon.

²³ Diboto Ia do na hupadao au sian karejo na targora, jana na so mardosa iba.

²⁴ Jadi dibalos Ia tu au, angke giotNia do antong nipambaenan, diboto Ia do na so adong hubaen hasalaan.

²⁵ Tuhan, tu halak na burju laing burju do Ho mambaen na denggan, i ma hadengganan na nibaenMu tu halak na so mardosa.

²⁶ Ias do rohaMu tu halak parroha na bulus, tapi dialo Ho do halak pargabus.

²⁷ Dipalua Ho do angka na toruk roha, dipatunduk Ho do na ginjang roha.

²⁸ Ho do hatiuranku, ale Tuhan Debatangku, Ho do na markuaso di hagolapanku.

²⁹ Markite pangurupiMu hutaluhon musu marparangan, jana hubolus benteng partahanan.

³⁰ Sanggam do pambaen ni Debata, janjiNia haposan do di roha. Tudos do Ia tu parince di halak na marpangondian tuSia.

³¹ Angke nada adong Debata asing sian Tuhan, hum Debata do na mangalehen parlindungan.

³² Ia do Debata na margogoihon au, na mambaen sonang di pardalananku.

³³ Dipargogoi Ia patku songon pat ni ursa di harangan, gabe sonang ma dalanku di pardolokan.

³⁴ Diajari Ia do au maralo di parporangan, sior na togu pe momo sajo husiorkon.

³⁵ Tuhan, Ho do na mandongani au dohot na paluahon au, jana tangan siamunMu do na manogu-nogu au, hara ni kuasoMu gabe marsangap au.

³⁶ Dijago Ho, anso tongtong langkangki togu, dipardimata Ho au gabe nada madabu.

³⁷ Huayak musungku, hutaluhon halahi, nada maradian au painte so mate halahi.

³⁸ Hutombomkon halahi lopus nada tolapsa jongjong, di jolo ni patku tinggang halahi.

³⁹ Ho do margogoihon au laho marporang, hupatunduk musungku lopus au monang.

⁴⁰ Dibaen Ho do musungki maporus sian au, hubunu halak na magigi mida au.

⁴¹ Marsurak halahi, hape so adong na mangurupi, pio-pio halahi tu Tuhan, nada ra Ia mangalusi.

⁴² Hududa halahi songon lamot ni abu na marhabangan, hudege-dege halahi songon bustak di dalan.

⁴³ Dipalua Ho au sian bangso na durako, dibaen Ho do au raja ni angka bangso. Bangso na so hutanda nahinan, saonnari madung huparhatoban.

⁴⁴ Bangso na asing i tunduk tu au, jana mangoloi muda tarbege parentangku.

⁴⁵ Mago sude hagarangonna i, jana humitir haruar sian bentengna i.

⁴⁶ Tuhan na mangolu! Nipuji ma na mambela au! Pasangap ma hagogoon ni Debata, na palua au!

⁴⁷ Ia do mamaloskon hajahatan ni musungku, bope na pataluhon angka bangso di jolongku.

⁴⁸ Dipalua au sian halak na jahat dohot sian musu jana dilehen hamonangan maradopkon alongku.

⁴⁹ Jadi hupagodang ma Tuhan di tonga-tonga ni angka bangso, jana huendehon ma puji-pujian diSia.

⁵⁰ Dilehen Debata do hamonangan godang tu raja, tongtong dihaholongi Ia na nipiliNia, i ma si Daud dohot pomparanna, ro di salolot-lolotna.