MASMUR 17 - BIBEL JAMITA NA DENGGAN

Tangiang ni halak na so marsala

¹ Tangihon au martangiang sian sandok rohangku, ale Tuhan, parate-atehon pio-piongku mangido hatigoran.

² Ho do na mangurupi au di parkarongku, diboto Ho do sanga dia na tutu.

³ Ditanda Ho do rohangku; muda borngin ro do Ho pamanatkon au; hape anggo hata dohot hagiot na jat, nada dapot Ho sian au.

⁴ Pangkuling ni parjahat nada hutiru, parentaMu huoloi jana na mangasahon gogo padaoonku.

⁵ Sai marguru tu hagiotMu do ngolungki jana nada manyimbil sian i.

⁶ Tu Ho do pio-pio au, angke dialusi Ho do au. O Debata, parate-atehon ma au, jana tangihon angka hatangku.

⁷ Patidahon ma holongMu na gok hahomangan, jadi hami dapotan haluaan. Di bagasan pangondingiMu, sonang hami sian pangaroro ni musu.

⁸ Ondingi au, songon pangondingiMu di anak ni mata, bunihon au tu bagasan parsilaungan ni habongMu,

⁹ sian hosom ni parjahat na manghaliangi au, sian musu na giot mangabisi hosangku.

¹⁰ Nada adong di halahi ibo ni roha hata-hata ni halahi, hata manggang na so hasaya.

¹¹ Humaliang do halahi ro giot mangalo, anso dilipatkon halahi au tu tano.

¹² Songon singa na mangonjap soroanna, madung singkop halahi mangaroro au anso sibakkononna.

¹³ Jongjong ma Ho Tuhan, alo jana taluhon ma musungku, palua au sian parjahat hara ni podangMu.

¹⁴ Palua ma au dohot tanganMu, ale Tuhan, sian angka jolma portibi on, na dapotan bagian di pangoluon on, padiar ma dipabutong butuha ni halahi dohot na dung dipasingkopMu, gabe dohot ma angka dakdanak ni halahi butongan, jana angka na teba i dilehen tu angka dakdanak na menek.

¹⁵ Tapi di bagasan hatigoran do, giot tataponku bohimu. Muda dung ngot au rap dohot Ho mambaen jop rohangku.