MASMUR 148 - BIBEL JAMITA NA DENGGAN

Langit dohot tano, puji ma Tuhan !

¹ Puji ma Tuhan, hamu sude na adong di banua ginjang, sandok na maringanan di inganan na timbo, puji ma Ia!

² Puji ma Ia, hamu sude angka surusuruanNia, puji ma Ia, hamu sandok tentara ni banua ginjang!

³ Puji ma Ia, o mataniari dohot bulan, puji ma Ia, ale angka bintang na humirlap-hirlap.

⁴ Puji ma Ia, ale langit na pargincat puji ma Ia, ale aek na di ginjang ni langit!

⁵ Denggan ma sude halahi mamuji Tuhan, angka parentaNia do manjadihon i sudena.

⁶ Ditontuhon Ia ingananna be ro di salolot ni lolotna, hot do hatontuan i dioloi halahi sude.

⁷ Puji ma Tuhan, o tano on dohot sude isina, o hamu angka naga laut dohot laut sinabidang;

⁸ ale hilap dohot ambolas, es dohot ombun, halingsungsung na mangoloi parenta ni Tuhan!

⁹ Puji ma Ia, hamu ale dolok dohot angka tor, ale suan-suanan dohot sude hayu harangan;

¹⁰ ale angka binatang na jinak dohot na riar, binatang na manjirir dohot angka unggas!

¹¹ Puji ma Ia, hamu ale angka raja dohot bangso sudena, angka na mora-mora dohot sude na markuaso;

¹² angka na uli dohot na poso bulung, na menek dohot na matobang.

¹³ Denggan do pujion ni halak goar ni Tuhan, dibaen gumodang do goar i sian sandok goar. HamuliaonNa gumincat sian tano dohot langit.

¹⁴ Madung dipargogoi Ia bangsoNia, halak Israel, hasianNia. Sude ma bangsoNia mamuji-muji Ia. Puji ma Tuhan!