MASMUR 147 - BIBEL JAMITA NA DENGGAN

Pujian tu Debata Na Markuaso i

¹ Dengganna i antong marende di Debatanta, sonang ma da mamuji-muji Ia.

² Mulak ma suang Jerusalem baenon ni Tuhan, obanonNia noma mulak angka halak na tarbuang.

³ Dipamalum Ia halak na marnyae roha, jana dibalut Ia angka bugangna.

⁴ Ditontuhon Ia bahat ni bintang di hajang-kajang, jana ganop be dilehen Ia goarna.

⁵ Na godang ma da Tuhanta jana na sumurung habisuhonNia nada tarsuhat.

⁶ Diangkat Ia halak na hona sosak, tapi anggo parjahat ditombomkon Ia tu tano.

⁷ Marsialus-alusan ma hamu marende puji-pujian tu Tuhan, marende ma hamu mardongan sora ni hasapi di Debatanta.

⁸ Ia do pahembangkon ombun di ginjang an, parohon udan di tano jana patubu duhut di dolok.

⁹ Dilehen Ia do jampalan di pahan-pahanan, di anak ni sigawak na nguak-nguak.

¹⁰ Nada lomo roha ni Tuhan tu kudo na gogo; sanga pe ulubalang na barani.

¹¹ Lomo do roha ni Tuhan tu halak na burju, tu halak na tongtong mararop ni roha tu holongNia.

¹² Puji ma Tuhan, ale Jerusalem! Puji ma Debatamu, ale Sion!

¹³ Dipatogu Ia do angka pintu ni horbanganmunu, jana dipasupasu Ia halak na manginganisa.

¹⁴ Dijago Ia do luatmunu anso dame tongtong, jana dipabutong Ia ho dohot gandum na tumabo.

¹⁵ Dipasahat Ia parenta tu portibi; manigor tarjadi na niparentahonNia i.

¹⁶ Diijur Ia salju songon imbulu ni biri-biri, jana disarsarkon Ia ombun na himpal songon abu.

¹⁷ Diparo Ia ambolas songon batu hara ni ngalina, sude halak humitir.

¹⁸ Jadi diparentahon Ia ma, gabe aek ma es i, diombuskon Ia haba-haba, gabe mardalan ma aek.

¹⁹ Dipabolkas Ia tonaNia tu bangsoNia, hatontuan dohot angka parenta tu bangso na nipiliNia.

²⁰ Anggo tu angka bangso na asing nada dibaen Ia songon i, nada ditanda halahi angka uhumNia i. Puji ma Tuhan!