MASMUR 146 - BIBEL JAMITA NA DENGGAN

Pujian tu Debata sipalua

¹ Puji ma Tuhan! Ale tondingku, puji ma Tuhan!

² Sai giot pujionku do Tuhan salolot mangolu au, jana marende di Debatangku salolot marhosa dope au.

³ Ulang pangasahon angka pangarajai, tu jolma na so bolas mangalehen haluaan.

⁴ Muda mate halahi, mulak be do halahi tu tano, laing di na sadari i sisoada ma sude sangkap na nibaenna.

⁵ Martua ma halak na mangasahon Tuhan Debatana, jana na mardebatahon Debata ni si Jakob, gabe pangurupina.

⁶ Ia do na manompa langit, tano dohot laut maradu isina, na tontong setia ro di salolot ni lolotna.

⁷ Dilehen Ia do hatigoran tu halak na hona sosak, jana na mangalehen sipanganon tu halak na male. Dipalua Tuhan do angka na tarhurung,

⁸ jana dibuka Ia do mata ni halak na mapitung. Ditogu Ia do halak na tinggang, jana dihaholongi Ia halak na tigor.

⁹ Dijagohon Ia do angka halak dagang, angka na mabalu dohot na tinggal menek diurupi Ia, tapi anggo sangkap ni halak na jahat disundati Ia.

¹⁰ Tuhan do Raja ro di salolot-lolotna. O Sion, markuaso do Debatamu ro di salolot-lolotna. Puji ma Tuhan!