MASMUR 145 - BIBEL JAMITA NA DENGGAN

Ende pujian

¹ Sai giot pagodangonku do Ho, ale Debatangku jana Rajangku, tongtong do au sai giot mandok tarimakasi tu adopanMu.

² Ganop ari do au mandok tarimakasi tu Ho, jana sai hupuji do tongtong goarMu.

³ Angke na tongam do Ho, ale Tuhan jana tarpuji situtu, nada hadodoan hagodanganMu.

⁴ Sian sundut tu sundut, sai pujionna do goarMu, jamitahonon ni halahi do hasangapanMu.

⁵ Pabotohonon ni halahi ma hagodanganMu na marmulia i, giot endehononku do pambaenanMu na pahomangkon i.

⁶ Pajojoron ni halahi ma karejoMu na godang i, giot jamitahononku ma hagodanganMi.

⁷ Paboa-boaon ni halahi ma sude hadenggananMu, jana endehononna ma hatigoranMu.

⁸ O Tuhan, gok holong ni roha do Ho jana na basa, na sobar jana sai parholong roha.

⁹ Burju do Ho tu ganop jolma, jana dihaholongi Ho do sude na nitompaMu.

¹⁰ O Tuhan, pujian ni sandok na nitompaMu ma Ho, mandok tarimakasi ma sude bangsoMu tu Ho.

¹¹ Pagodangon ni halahi ma kuasoMu songon raja, jana baritahononna ma pambaenanMu na marsahala.

¹² Jadi botoon ni halak ma sudena karejoMu na sangap i, dohot harajaan na godang jana na jeges i.

¹³ Hot do harajaanMu sapanjangna, ro di salolot-lolotna do martahan kuasoMu. O Tuhan, setia do Ho di sude janjiMu, na denggan ma da tutu sude pambaenanMu.

¹⁴ Diurupi Ho do halak na di bagasan hasusaan, jana dipadorgak Ho do halak na dung unduk.

¹⁵ Sandok na mangolu tu Ho do mararop ni roha, dilehen Ho do halahi mangan muda dapot di hatihana.

¹⁶ Dipatuk Ho do sude haporluanna, gabe nada halahi marhahurangan.

¹⁷ Tigor do Tuhan i di sude tindakanNa, gok holong ni roha do Ia di sude na nibaenNa.

¹⁸ Donok do Ia tu halak na pio-pio tuSia, tu ganop halak na martangiang sian bulus ni rohana.

¹⁹ Dipasonang Ia do roha ni angka na burju marugamo, ditangihon Ia do pio-pio ni halahi jana dipalua Ia.

²⁰ Dilinggomi Ia do ganop halak na manghaholongi Ia, tapi anggo parjahat dipusa Ia.

²¹ Sai giot pujionku do tongtong Tuhan; o sude na nitompaNa, puji ma goar ni Tuhan salolot-lolotna.