MASMUR 144 - BIBEL JAMITA NA DENGGAN

Mandok tarimakasi raja i tu Tuhan hara ni hasonangannia

¹ Puji ma Tuhan, pangondianku! Dilatik Ia do au marjuang, jana diajar Ia do au marporang.

² Ia do pangondian dohot na mambela au, parlinggoman dohot na palua au. Ia do pos ni rohangku, muda diSia sonang do au; tunduk dibaen Ia angka bangso tu au.

³ O Tuhan, aha ma he lakna jolma i umbaen na pola diparrohahon Ho? Ise he i umbaen pola dipardimata Ho?

⁴ Tudos tu sangombus alogo sajo do da jolma i, songon halinu na mamolus, songon i ma ngolu ni halahi.

⁵ Ale Tuhan, buka ma langitMi jana mijur ma Ho, goit ma angka dolok i anso martimus.

⁶ Danggurkon ma hilapMu anso masarsar musu i, palua ma anak ni siorMu anso marsitondong dalanna halahi maporus.

⁷ Surduhon ma tanganMu sian banua ginjang, jana palua ma au sian banjir na mangalantap. Palua ma au sian kuaso ni halak na asing

⁸ na sai margabusi dohot manipu dohot na mambaen sumpa na so tutu.

⁹ Endehononku ma di Ho logu na imbaru, ale Debata, jana piltihonku ma hasapi na martali sampulu.

¹⁰ Dilehen Ho do hamonangan di angka raja, jana di si Daud naposoMu dilehen Ho do haluaan.

¹¹ Palua ma au sian podang ni halak na jungkat, palua ma au sian kuaso ni halak na asing na sai margabusi jana manipu, dohot na mambaen sumpa na so tutu.

¹² Sai simbur magodang ma angka anakta di haposoonna, songon hayu na mur pir jana margogo. Sai majogi nian angka borunta songon tiang na jeges, na manghiasi angka suhi ni bagas godang.

¹³ Sai bubung ma nian angka soponta marisi dohot sude suha ni karejonta i. Sai sinur ma angka biri-biri na tapahan di padang mamopari lopus marpulu ribu bahatna.

¹⁴ Sai mamopari ma angka lombunta, jana ulang adong nian na tarposo sanga na marmagoan. Sai ulang nian adong na habegean holsoan tu pandelean di angka dalan na di kotanta.

¹⁵ Martua ma bangso na dumpang songon i pangalahona, martua ma bangso na marDebatahon Tuhanta!