MASMUR 141 - BIBEL JAMITA NA DENGGAN

Tangiang borngin

¹ Pio-pio do au tu Ho, ale Tuhan, markobas ma Ho mangurupi au. Sai manangi ma nian Ho muda pio-pio au tu Ho.

² Jagit ma tangiangku songon haul hamonyan, tanganku na hupahortang songon haul borngin.

³ Ale Tuhan, jagohon ma pamanganku, jana matai ma bibirku.

⁴ Padao ma au sian hagiot mambaen na jahat dohot sian pangalaho na so jadi. Ulang paloas au mardongan dohot halak na so ture jana dohot mangan di pesta ni halahi pe.

⁵ Muda digorahon sanga diuhum halak na tigor au, i ma da sada pangalaho na denggan di au. Tapi anggo pamuji ni halak na jahat nada hujagit i, angke sai torus do au martangiang mangalo hajahatanna i.

⁶ Muda dipasahat halahi tu angka panguhumna, baru pe anso botoon ni halahi na tutu do hatangki.

⁷ Songon batu na ditapor lalu dironcohon, songon i ma holi-holi ni halahi rerakkonon di topi ni kuburan.

⁸ Tapi anggo au, sai tu Ho do marpos ni roha, ale Debata, Tuhanku. Tu Ho do au marlindung, ulang ma padiar au mate boti.

⁹ Ondingi ma au sian jorat na nitaon ni halahi tu au, sian tirangkap ni angka parjahat i.

¹⁰ Sai halahi ma nian tinggang baenon ni joratna, anggo au malua ma kehe mangalangka.