MASMUR 138 - BIBEL JAMITA NA DENGGAN

Tangiang tarimakasi

¹ Sai giot mandok tarimakasi do au tu Ho, ale Tuhan, sian sude rohangku. Di jolo ni sude debata, huendehon puji-pujian di Ho.

² Di na hupuji goarMu, laing marsomba muse au adop BagasMu na badia, angke setia do Ho jana sai marholong roha, madung dipatorang Ho, goar dohot angka parentaMu disalpui i do sasudena.

³ Mangalusi do Ho muda pio-pio au tu Ho, marhite hagogoanMu, au dipargogoi Ho.

⁴ Pujion ni sude raja na satano on do Ho, ale Tuhan, angke madung habegean janjiMu tu halahi.

⁵ Endehonon ni halahi ma taringot tu pambaenanMu, angke na godang do kuasoMu.

⁶ Na godang do Ho, hape laing diparrohahon Ho muse do halak na menek, nada tarbaen halak siginjang roha martabuni sian joloMu.

⁷ Dompak ro siarsakkonon tu iba, dijago Ho do au anso tongtong sonang. Dialo Ho do musungku na gasa-gasaon jana dipalua Ho do au marhite kuasoMu.

⁸ Giot patulusonMu do sandok na nijanjihonMu. Tuhan, hot do holong ni rohaMu sapanjangna, ulang ma tadingkon na dipungka ni tanganMu.