MASMUR 137 - BIBEL JAMITA NA DENGGAN

Andung di topi ni angka batang aek di Babel

¹ Di topi ni angka batang aek di Babel, disi do hita juguk huhut tangis muda hita ingot Sion.

² Di bona ni ampolu na disi, tagantungkon hasapinta.

³ Angka halak na manaban hita marsuru hita marende di halahi. Angka halak na mamparhanciti hita, marsuru hita mangendehon angka logu na riang sian Sion.

⁴ Songon dia ma he di tano na asing marendei hita di Tuhan?

⁵ Indangkon sai huboto be marhasapi muda pola huhalupahon ho, Jerusalem!

⁶ Indangkon sai huboto be marende muda huhalupahon ho jana muda so hubaen ho gabe sijop ni rohangku!

⁷ Ale Tuhan, ingot ma pambaenan ni halak Edom, dompak na ro halahi manaban Jerusalem. Sai marpupu didok halahi, “Unggalkon ma lalu tu ojahanna i!”

⁸ Segohonon noma ho, ale Babel hara ni na sai mangasa gogo do giotmu. Martua ma sanga ise na mamalos tu ho hajahatan na nibaenmu tu hami.

⁹ Martua ma sanga ise na mambuati angka dakdanakmu jana na manyampakkonsa tu dolok batu.