MASMUR 135 - BIBEL JAMITA NA DENGGAN

Ende pujian

¹ Puji ma goar ni Tuhan, ale hamu angka naposoNia

² na mangoloi di Bagas Ni Tuhan di inganan ni Debata.

³ Puji ma Tuhan, angke na denggan do Ia, puji ma goarNia, dibaen na basa do rohaNia.

⁴ Ditodo Ia si Jakob baen diSia sandiri halak Israel, dibaen Ia gabe nampunaNia.

⁵ Huboto do tangkas, na santak godang do Tuhanta diatasi Ia do sandok debata.

⁶ Dibaen Ia do sanga na aha giotNia, di langit an dohot di tano on, di laut dohot di na bagas ni lautan.

⁷ Sian ujung ni portibi diparo Ia ombun dibaen Ia hilap mardongan udan. Dung i diparentahon Ia tu haba-haba anso ruar be sian panyimpananna.

⁸ Di Mesir dibunu Ia sude anak siangkaan ni binatang dohot anak siangkaan ni jolma.

⁹ Bahat dibaen Ia hahomangan dohot tanda laho manguhum raja ni Mesir dohot sude pagawena.

¹⁰ Dipusa Ia bahat bangso jana dibunu angka raja na markuaso.

¹¹ Si Sihon raja ni Amori dohot si Og raja ni Basan, maradu sude raja ni Kanaan.

¹² Jadi dipasahat Ia ma tano ni halahi tu Israel bangsoNa i.

¹³ Ale Tuhan, sai hot do Ho dijamitahon jana goarMu pe sai diingot di sudena sundut.

¹⁴ BelaonMu ma bangsoMu jana maribo ni roha Ho di angka naposoMu.

¹⁵ Holan sian sere dohot perak manangkas do sisombaon ni halahi, na nipature ni tangan ni jolma.

¹⁶ Marbaba do nian, tapi nada malo mandok hata, adong matana, hape nada marnida.

¹⁷ Marpinggol do nian, tapi nada marbinege, sian pamanganna inda haruar hosa.

¹⁸ Sai songon i ma nian bagian ni angka jolma na mambaensa dohot angka na manghaporsayaisa.

¹⁹ Puji ma Tuhan, ale bangso Israel, puji hamu ma Ia, ale angka malim ni Debata!

²⁰ Puji ma Tuhan, hamu angka halak Levi, puji hamu ma Ia, sude hamu na marsomba tuSia!

²¹ Puji ma Tuhan di Sion, di Jerusalem inganan parmiananNia. Puji ma Tuhan!