MASMUR 132 - BIBEL JAMITA NA DENGGAN

Puji-pujian di Bagas Ni Tuhan

¹ O Tuhan, ingot ma si Daud dohot sude pardangolannia.

² Ulang halupahon janjinia, ale Debata ni si Jakob, haulnia na tu Ho, Tuhan Na Gumogo.

^3-4 Didok ia do, “Nada maradian au di undung-undungku, sanga modom di podomanku,

⁵ anggo so jolo hupasingkop bagas ni Debata ni si Jakob, inganan parmianan di Tuhan Na Gumogo i.”

⁶ Tarbege do di Betlehem taringot tu Poti Parjanjian, jadi gabe dapot hita do i di Padang Jearim.

⁷ Beta ma hita kehe tu inganan parmianan ni Tuhan, jana tasomba Ia di adopan ni habangsaNia.

⁸ Ro ma Ho ale Tuhan jana maringanan ma di BagasMu, rap dohot Poti Parjanjian tanda ni kuasoMu.

⁹ Sai marjop ni roha ma nian bangsoMu jana angka malimMu pe sai mangolu ma mangihutkon giot ni rohaMu.

¹⁰ Madung dijanjihon Ho tu si Daud, naposoMi; ale Tuhan, ulang tulak raja na nitodoMi.

¹¹ Mardongan sumpa do dijanjihon Ho tu si Daud, jana nada tarihonMu be janjiMi mangulahi. NingMu do, “Sada sian anakmu baenonKu gabe raja; ia ma manggontihon ho marhabangsa.

¹² Muda setia angka dakdanakmu tu parjanjianKu, jana burju mangoloi angka parentangKu, jadi salolot-lolotna ma pomparan ni halahi manggontihon ho mangarajai.”

¹³ Dibaen madung dipili Tuhan Sion; giot ni rohaNia maringanan Ia disi.

¹⁴ Didok Ia do, “On ma ingananKu salolot-lolotna, dison ma por rohangKu marhabangsa.

¹⁵ Marlobian lehenonKu sandok haporluanna, butongan lehenonKu mangan angka na pogos.

¹⁶ PasupasuonKu angka malimnia di sude ragam ni karejona, marendei jana marmoga-moga ma bangsonia.

¹⁷ Sahalak sian pomparan ni si Daud baenonKu gabe raja, patoguonKu ma pangarajaionnia.

¹⁸ Sai na marhasonangan do harajaanna, tapi anggo musuna sai marhahaila.”