MASMUR 124 - BIBEL JAMITA NA DENGGAN

Debata do pangondingan

¹ Bia do sugari nada mamihak tu hita Tuhan? Hamu halak Israel, alusi hamu ma songon on:

² “Muda nada mamihak Tuhan tu hita di na diserang ni musu hita,

³ madung hona bondut hian hita mangolu-olu, hara ni muruk ni roha ni halahi mida hita.

⁴ Pasti diayupkon aek magodang hian hita, jana dibonom aek.

⁵ Ujungna mate mogap hian ma hita di husor ni aek na jorbut i.”

⁶ Tole ma tadok tarimakasi tu Tuhan, angke antong nada dipadiar Ia hita dibondut musu.

⁷ Songon unggas na malua sian sambil ni parburu, magotap sambil i, gabe malua hita!

⁸ Sian Tuhan do ro pangurupi di hita sian Sitompa langit dohot tano on.