MASMUR 119 - BIBEL JAMITA NA DENGGAN

Tona Ni Tuhan Tua ni halak na mangoloi Tona Ni

¹ Martua ma halak na so targora di ngoluna, jana na mardalan mangoloi Tona Ni Tuhan.

² Martua ma halak na mangihutkon parentaNia, jana na manggogo sian sandok rohana mananda Tuhan.

³ Martua ma halak na mangihutkon hagiot ni Tuhan di ngoluna, jana na so mambaen hajahatan.

⁴ Dilehen Ho do, ale Tuhan, parentaMu tu hami, anso setia hami nian mandalankon i.

⁵ Sai togu ma nian rohangku mandalankon angka aturanMu.

⁶ Muda huparrohahon sude parentaMu, gabe nada jabat maila be au.

⁷ Ganop hutangkasi tigor ni haputusanMu, hupuji do Ho sian ias ni rohangku.

⁸ Sai giot oloanku do parentaMu, bagi na bia pe ulang ma tadingkon au.

Mangoloi Tona Ni Tuhan

⁹ Tarjagohon na poso do dirina sian hahodaron, muda diihutkon parentaMu di ngoluna, ale Tuhan.

¹⁰ Sian sandok rohangku huusahahon do laho mananda Ho, ulang padiar au manyimbil sian parentaMu.

¹¹ Madung husimpan pangajaranMu di bagasan rohangku, anso ulang mardosa au maradopkon Ho.

¹² Hupuji do Ho, ale Tuhan, ajarkon ma tu au angka hatontuanMu.

¹³ Marsora na gogo giot pabotohononku sandok uhum na nilehenMu.

¹⁴ Marjop ni roha do au hara ni angka parentaMu, songon na maniop sinadongan na bahat.

¹⁵ Giot huparsiajari do angka haputusanMu, sai hudodo-dodoi do angka panogu-noguMu.

¹⁶ Gabe sonang do au dibaen hatontuanMu; nada huhalupahon pangajaranMu.

Tua hara ni Tona Ni Tuhan

¹⁷ Mardenggan basa ma Ho tu au naposoMon, anso laing mangolu au jana mangoloi pangajaranMu.

¹⁸ Ungkap ma matangku anso huida di bagasan TonaMu pangajaran na pahomang roha.

¹⁹ Halak na asing do au di portibi, ulang bunihon parentaMu sian au.

²⁰ Hancit ate-atengku mananggung lungun, sai giot botoonku do uhumMu di ganop hatiha.

²¹ Digorahon Ho do halak siginjang roha, diburai Ho do halak na manyimbil sian parentaMu.

²² Padao ma pangincaki ni halahi sian au, dibaen madung hudalankon aturanMu.

²³ Haru pe marsatahi angka parkuaso mangalo au, giot pajaha-jahaonku do hatontuanMu di bagasan rohangku.

²⁴ Angka aturanMu do na gabe silehen sipaingot di au na pasonangkon rohangku.

Por ni roha laho mangoloi Tona Ni Tuhan

²⁵ Payak do au tarpodom di abu; paulak ma ngolungku hombar tu janjiMu.

²⁶ Huoku do parbuatanku, gabe dialusi Ho au; ajari ma au mardalan mangihutkon aturanMu di ngolungku.

²⁷ Urupi ma au mangastui angka parentaMu, pasari-sarionku ma angka hahomangan ni pambaenanMu.

²⁸ Magete rohangku hara ni marsakna, pargogoi ma au hombar tu janjiMi.

²⁹ Padao ma au sian dalan haliluan, jana lehen ma di au TonaMu.

³⁰ Madung diputuskon rohangku laho mangoloi, sai huingot-ingot do parentaMi.

³¹ Madung huihutkon aturanMi, ale Tuhan ulang padiar au marhahaila.

³² Sonang do rohangku giot mangoloi parentaMu, angke dibaen Ho do au mur mangastui.

Tangiang mangido parbinotoan

³³ O Tuhan, ajari ma au mangastui hatontuanMu, anso sai tongtong ma i patulusonku.

³⁴ Baen ma au mangarti di TonaMi, anso huoloi, jana hudalankon sian sandok rohangku.

³⁵ Sai gomos ma au marsitiopan tu parentaMu, angke martua do au marhite na mangoloisa.

³⁶ Lehen ma di au lungun ni roha laho mangoloi aturanMu, manyalpui por ni roha gabe mamora.

³⁷ Jagohon ma au ulang sai huparayak na so porlu, lehen ma di au ngolu mangihutkon hagiotMu.

³⁸ Patogu ma janjiMu tu naposoMu, janji na nilehenMu tu halak na burju mangoloi Ho.

³⁹ Padao ma habilean na sai huhabiari, angke na denggan do tutu parentaMu.

⁴⁰ Lehen ma di au ngolu na imbaru, angke na tigor do Ho, sai por do rohangku mangoloi haputusanMu.

Mararop roha tu Tona Ni Tuhan

⁴¹ Patuduhon ma ale Tuhan, sanga songon dia pangkaholongiMu di au, palua ma au hombar tu baga-bagaMu.

⁴² Jadi gabe taralusi au ma angka na palayas au, angke mangasahon hataMu do au.

⁴³ Urupi ma au, anso sai mandok na tutu au, angke mararop roha tu haputusanMu do au.

⁴⁴ Sai giot marsitiopan tu TonaMu do au, ro di salolot-lolotna.

⁴⁵ Giot mangolu au songon halak na mardeka, angke sai huparayak do mangihut di pangajaranMu.

⁴⁶ Baritahononku ma aturanMi tu angka raja, jana nada au gabe marhahaila.

⁴⁷ Patuluskon parentaMu, i do hasonanganku, angke huhaholongi do i antong.

⁴⁸ Hupasangap jana huhaholongi do parentaMu, pasari-sarionku ma hatontuanMu.

Porsaya tu Tona Ni Tuhan

⁴⁹ Ingot ma janjiMu tu au, naposoMon, janji na mangalehen arop ni roha di au on.

⁵⁰ Salang di pardangolanku laing tarapul do rohangku, angke dilehen janjiMi do ngolu di au.

⁵¹ Sun do bilena au dibaen siginjang roha, tapi nada manyimbil au sian TonaMu.

⁵² O Tuhan, huingot do parentaMu na adong sian najolo, gabe tarapul ma rohangku.

⁵³ Muda huida halak na jahat mangalanggar TonaMu, marsigorgor ma muruk ni rohangku.

⁵⁴ Salolot di ngolungku na pendek on, di tano on logu pujian do hubaen hatontuanMu.

⁵⁵ Huingot do Ho muda borngin, ale Tuhan, sai hutiop do tongtong TonaMu.

⁵⁶ On ma da na gabe hatuaanku, di na huoloi angka TonaMu.

Pangoloion maradopkon Tona Ni Tuhan

⁵⁷ Hum Ho sajo do por ni rohangku, ale Tuhan, marjanji do au mandalankon pangajaranMu.

⁵⁸ Mangido au sian sandok rohangku; domu tu janjiMu, rade ma au uhumanMu.

⁵⁹ Madung hutimbangi pangalahongku, jana marjanji giot oloanku paraturanMu.

⁶⁰ Huompoti nada pola hupalalap laho mandalankon parentaMu.

⁶¹ Mamasang jorat angka parjahat tu au tapi nada huhalupahon TonaMu.

⁶² Tonga borngin ngot au mamuji Ho, angke tigor do angka haputusan na nibaenMu.

⁶³ Ale-ale ni na manghabiari Ho do au, dohot na patuluskon parentaMu.

⁶⁴ O Tuhan, gok holong ni rohaMu do portibi on ajarkon ma tu au angka hatontuan na nibaenMu.

Arga ni Tona Ni Tuhan

⁶⁵ Tuhan, madung digohi Ho janjiMu, jana mardenggan basa Ho tu naposoMu.

⁶⁶ Lehen ma bisuk dohot parbinotoan tu au, angke porsaya do au tu angka parentaMu.

⁶⁷ Na jolo somal do au manyimbil, dung diuhumi Ho, hutiop janjiMi.

⁶⁸ Na denggan ma antong rohaMu, jana denggan muse pambaenanMu ajarkon ma tu au angka hatontuan na nibaenMu.

⁶⁹ Ditilakoi halak siginjang roha au, tapi sian sandok rohangku, huoloi haputusanMu.

⁷⁰ Nada diastui angka jolma i, hape anggo di au uhumMi do pasonang rohangku.

⁷¹ Tutu denggan do i angke Ho do manguhumi au, anso hutanda angka hatontuan na nibaenMu.

⁷² Ummarga do di au TonaMu ulang pado sude sinadongan na di tano on.

Hatigoran ni Tona Ni Tuhan

⁷³ Ho do na manjadihon dohot na manompa au lehen ma di au parbinotoan laho mangastui angka parentaMu.

⁷⁴ Angka na mabiar mida Ho sonang rohana muda diidasa au, angke marpos ni roha tu janjiMu do au.

⁷⁵ Huboto do ale Tuhan, tigor do haputusanMu, hara ni habonaranMu, diuhum Ho au.

⁷⁶ Apoi ma au marhite holong ni rohaMu na manongtong i, hombar tu janjiMu tu naposoMon.

⁷⁷ Ibo ma rohaMu di au gabe hot ma au mangolu, angke TonaMu do jop ni rohangku.

⁷⁸ Sai maila ma nian na ginjang roha i, hara ni na manilakoi au, anggo au angka parentaMu do na laing hupikiri.

⁷⁹ Sai ro ma nian tu au angka na mangkabiari Ho, gabe botoon ni halahi ma angka aturanMu,

⁸⁰ Sai ulang nian manyimbil rohangku sian hatontuanMu, anso ulang au marmalu-malu.

Tangiang mangido dipalua

⁸¹ Malungun situtu do rohangku di haluaan na sian Ho, ale Tuhan, janjiMu do na huhaposi.

⁸² Barnit matangku, paintehon Ho manggohi baga-bagaMu, marsapa au, “Andigan do apoanMu au?”

⁸³ Markerut huling-kulingku songon inganan ni anggur na buruk, tapi anggo hatontuan na nibaenMu nada huhalupahon.

⁸⁴ Intap ni andigan sai sobar naposoMon? Sadihari do uhumonMu na mamparkanciti au?

⁸⁵ Halak na gakgak na so patu tu TonaMu, madung manghuar lubang laho manjorat au.

⁸⁶ Tarpangasahon do parentaMu, tolong ma da au, angke nada adong dalanna dikojar halahi au.

⁸⁷ Saotik nari noma anso dibunu halahi au, tapi nada hupasiding parentaMu.

⁸⁸ Hara ni hot ni holong ni rohaMu, urupi ma au, anso taroloi au parentaMu.

Porsaya tu Tona Ni Tuhan

⁸⁹ Tuhan, salolot-lolotna do marlaku hataMu, di banua ginjang sapanjangna.

⁹⁰ Sian sundut tu sundut do habonaranMu, dipajongjong Ho tano on, gabe laing hot togu.

⁹¹ Sandok na adong saonnari, hara ni parentaMu do i adong, harana angka naposoMu do i sudena.

⁹² TonaMu do mual ni hamogaanku sugari nada songon i, ma pola mate au di hasusaanku.

⁹³ Matua na so ra do au pasiding parentaMu, angke dohot parentaMi do dipangolu Ho au.

⁹⁴ Palua ma au, dibaen Ho do nampuna au, madung husitutui mangoloi haputusanMu.

⁹⁵ Sai inte do parjahat i laho mamunu au, tapi sai hupasari-sari do parentaMu.

⁹⁶ Marujung be do huida sandok na singkop, hum parentaMu do na sanggam.

Holong ni roha tu Tona Ni Tuhan

⁹⁷ Holong sajo do rohangku mida TonaMu, jana sai hupasari-sari do i sasadari.

⁹⁸ Umbisuk do au sian angka musungku angke sai huingot do parentaMu.

⁹⁹ Marrohaan do au ulang pado angka gurungku, angke hupasari-sari do angka parentaMu.

¹⁰⁰ Umboto do au sian angka na tobang-tobang, angke sai hudalankon do angka haputusanMu.

¹⁰¹ Hupasiding do sude parange na so ture anso huoloi pangajaranMu.

¹⁰² Nada hupapudi angka uhumMu, angke Ho sandiri do mangajari au.

¹⁰³ Tonggina i antong baga-baga na nidokMu tumonggi do i sian manisan di pamangan.

¹⁰⁴ Angka parentaMu do mangalehen di au parbinotoan, gabe huhagigihon sandok na margoar hajahatan.

Tona Ni Tuhan mangalehen na torang

¹⁰⁵ HataMi do sulu-sulu di langkangku, jana sinondang na manorangi dalanku.

¹⁰⁶ Na hujanjihon mardongan sumpa gohanku ma i, haputusanMu na tigor i patulusonku do i.

¹⁰⁷ Lebak sajo do au, ale Tuhan, jagohon ma ngolungku songon na nijanjihonMu.

¹⁰⁸ O Tuhan, jagit ma tangiangku mandok tarimakasi jana ajarkon ma tu au angka parentaMu.

¹⁰⁹ Sai husabung do tongtong ngolungku, tapi nada huhalupahon anggo TonaMu.

¹¹⁰ Mambaen jorgong do halak parjahat tu au, tapi nada manyimbil au sian haputusanMu.

¹¹¹ ParentaMu do pusako di au salolot-lolotna, na mambaen rohangku marmoga-moga.

¹¹² Sai giot oloanku do hatontuan na nibaenMu, lopus tu ujung ni ngolungku.

Tona Ni Tuhan mambaen sonang pangkilalaan

¹¹³ Sai magigi do au mida halak na meol-eol, tapi huhaholongi do angka TonaMu.

¹¹⁴ Ho do pangondian dohot parlindunganku, marsitiopan tu baga-bagaMu do au.

¹¹⁵ O hamu parjahat! Morot ma ho sian au! Sai giot momosanku do parenta ni Debatangku.

¹¹⁶ Domu tu janjiMu pargogoi ma au anso laing mangolu, ulang paloas au dipaila di bagasan arop ni rohangku.

¹¹⁷ Tungkoli ma au anso sonang, jana anso sai huparrohahon parentaMu.

¹¹⁸ Ditulak Ho do halak na manyimbil sian hatontuanMu, sayang boti do sangkap ni halahi na gok tipu.

¹¹⁹ Sude halak na jahat di tano on songon tasik ni bosi, hara ni i huhaholongi do sude paraturanMi.

¹²⁰ Humitir do au hara ni na mabiar mida Ho, panyogiton do au maradopkon haputusanMu.

Mangoloi Tona Ni Tuhan

¹²¹ Madung hubaen na denggan dohot na tigor, ulang ma pasahat au tu tangan ni alongku.

¹²² Janjihon ma paboa na giot urupanMu au, ulang padiar halak siginjang roha manyosak au.

¹²³ Maniak matangku painte Ho laho paluahon au, painte-inte haluaan na ni baga-bagahonMu.

¹²⁴ Baen ma tu au marguru tu godang ni holong ni rohaMu, jana ajarkon ma tu au hatontuan na nibaenMu.

¹²⁵ NaposoMu do au on, baen ma au mangarti, paraturanMi anso huastui.

¹²⁶ O Tuhan, madung hatihana do tindakan baenonMu, angke nada dioloi halak tona na nipasahatMu.

¹²⁷ Huhaholongi do angka parentaMu lobi sian sere na pita.

¹²⁸ Hara ni i ma umbaen na huihutkon sude sipaingotMu, jana huhagigihon dalan na sala.

Lungun ni roha mangihutkon Tona Ni Tuhan

¹²⁹ Hahomangan situtu do angka paraturan na nibaenMu, gabe hupatulus do i sian sude rohangku.

¹³⁰ Muda dipatorang, pangajaranMu mur tumangkas mangalehen hatorangan, mangalehen parbinotoan tu halak na oto.

¹³¹ Monggak-onggak parhosangku, hara ni na manghalungunkon parentaMu.

¹³² Manaili ma Ho tu au jana ibo ma rohaMu di au, songon panghasianiMu di halak na nihaholonganMu.

¹³³ Patogu ma langkangku hombar tu baga-bagaMu, ulang padiar dirajai hajahatan au.

¹³⁴ Palua ma au sian angka na mamparkanciti au, anso taroloi au paraturanMu.

¹³⁵ Sai pasupasu ma au marhite haroroMu, jana ajarkon ma tu au hatontuan na nibaenMu.

¹³⁶ Mabaor ilungku songon batang aek, hara ni TonaMu na so dipatulus.

Tigor do Tona Ni Tuhan

¹³⁷ Tigor situtu do Ho, ale Tuhan, tumbuk do sude parentaMu.

¹³⁸ Angka parenta na nilehenMu pe, sude do denggan jana ture.

¹³⁹ Marsigorgor do murukku, hara ni na layas roha ni musungku di pangajaranMu.

¹⁴⁰ Hot do janjiMu jana haposan, sai holong do rohangku midasa,

¹⁴¹ menek do au on boti bile, tapi anggo pangajaranMu nada huhalupahon.

¹⁴² Hot do martahan hatigoranMu salolot-lolotna, jana sai na bonar do TonaMu sapanjangna.

¹⁴³ Sai marsak situtu do au jana humasusa, tapi hatontuan na nibaenMu do pajop rohaniba.

¹⁴⁴ Sapanjangna do tigor paraturanMu, lehen ma di au pangastuion anso mangolu au.

Tangiang mangido haluaan

¹⁴⁵ Pio-pio do au tu Ho sian sude rohangku, alusi ma au ale Tuhan, oloanku do parentaMu.

¹⁴⁶ Pio-pio do au tu Ho, sai palua ma au, giotku sai marsitiopan do tu paraturanMu.

¹⁴⁷ Pio-pio do au tu Ho manyogot-nyogot, pos do rohangku di janjiMu.

¹⁴⁸ Sasaborngin sai jonggor do matangku, laho pasari-sari pangajaranMu.

¹⁴⁹ Sai matua na marholong roha do Ho, patuduhon ma holong ni rohaMu, tangihon ma au jana jagohon ma ngolungku.

¹⁵⁰ Madung dipadonok angka na giot manyosak au, jahat do maksud ni halahi jana nada mangoloi tu TonaMu.

¹⁵¹ Hape donok do Ho Tuhan tu au, topet do sude parentaMu.

¹⁵² Madung honok huboto angka paraturanMu, dipahot Ho do i anso manongtong salolot-lolotna.

Tangiang mangido pangurupion

¹⁵³ Tatap ma pardangolanku jana palua ma au, angke nada huhalupahon TonaMu.

¹⁵⁴ Ondihon jana palua ma au, pangolu ma au hombar tu baga-bagaMu.

¹⁵⁵ Anggo parjahat nada tarbaensa malua, angke nada didalankon halahi hatontuanMu.

¹⁵⁶ Ale Tuhan, na godang ma tutu asi ni rohaMu lehen ma ngolungku hombar tu uhumMu.

¹⁵⁷ Bahat halak na mamusui dohot na manyosak au tapi nada hupasimbil paraturanMu.

¹⁵⁸ Magigi au mida angka panghianat i, hara ni na so diihutkon halahi pangajaranMu.

¹⁵⁹ Ligi ma ale Tuhan, godang ni holong ni rohangku di parentaMu, pangolu ma au hara ni denggan ni basaMu.

¹⁶⁰ Tutu do sude hataMi, hot do salolot-lolotna parentaMu na tigor i.

Mangoloi Tona Ni Tuhan

¹⁶¹ Disosak angka na markuaso do au soada dalanna, tapi mabiar mida parentaMu sajo do au.

¹⁶² Baga-bagaMu mambaen jop ni rohangku, songon halak na dapotan harto.

¹⁶³ Huhagigihon do sude gabus, tapi huhaholongi do TonaMu.

¹⁶⁴ Sai marpupu do au mandok tarimakasi tu Ho, angke tigor do antong parentaMu.

¹⁶⁵ Dumpangan hasonangan do halak na manghaholongi TonaMu, nada tarambati sanga aha pe halahi.

¹⁶⁶ Hupainte do haluaan sian Ho ale Tuhan, jana hukarejohon do na nidokkonMu.

¹⁶⁷ Hupatulus angka paraturanMu, jana huhaholongi do i sian sasude rohangku.

¹⁶⁸ Huoloi sude parentaMu dohot sandok panoguMu, diida Ho do sude pambaenanku.

Tangiang mangido pangurupion

¹⁶⁹ Ale Tuhan, sai bolkas ma tu Ho angguk-anggukku, lehen ma di au parbinotoan songon na nijanjihonMu.

¹⁷⁰ Tangihon ma tangiangku jana palua ma au, songon na nidok ni baga-bagaMu.

¹⁷¹ Sai giot pujionku do Ho tongtong, dibaen diajarkon Ho do tu au hatontuanMu.

¹⁷² Por do rohangku marende salaho tu janjiMu, angke tigor do sude parentaMu.

¹⁷³ Sai urupi ma tongtong au angke huoloi do antong paraturanMu.

¹⁷⁴ Lungun sajo rohangku di haluaan na sian Ho, Tuhan, dilehen TonaMu do di au hatuaan.

¹⁷⁵ Lehen ma di au ngolu, anso hupuji Ho, sai diurupi haputusanMu ma au.

¹⁷⁶ Songon biri-biri na mago, lilu do au, tapi nada hupasiding anggo parentaMu. Antong ro ma Ho, jalahi ma au, angke naposoMu do au.