MASMUR 115 - BIBEL JAMITA NA DENGGAN

Pujian di Debata Na Markuaso i

¹ Nada hami ale Tuhan, nada hami, tapi hum Ho sajo do angkon dipuji, angke setia do Ho jana tongtong manghaholongi.

² Biasi angkon sai pola dokkonon ni angka bangso, “Di dia ma he Debata ni halahi?”

³ Di banua ginjang do anggo Debatanta, dibaen Ia do sanga aha giot ni rohaNia.

⁴ Anggo sisombaon ni halahi sere dohot perak sajo, na nitukangan ni tangan ni jolma do.

⁵ Adong do nian pamanganna, tapi nada malo mandok hata; adong matana, hape nada marnida.

⁶ Marpinggol do nian halahi, tapi umpe marbinege, marigung hape nada marnianggo.

⁷ Martangan do halahi, tapi nada tarbaen manjama, marpat, hape nada malo mardalan; jana nada adong sora na ruar sian aru-aruna.

⁸ Sai songon i ma nian bagian ni na paturehonsa, maradu sude angka halak na manghaporsayaisa.

⁹ Tapi anggo ho ale Israel, Tuhan ma haposi, Ia do pangurupimunu jana pangondianmunu.

¹⁰ Hamu ale horong ni si Harun, Tuhan ma haporsayai hamu, Ia do na mangurupi dohot na mangondingi hamu.

¹¹ Ale hamu sude na burju marugamo, Tuhan ma haposi hamu, Ia do na mangurupi dohot na mangondingi hamu.

¹² Diingot Tuhan do hita jana pasupasuonNia do hita, pasupasuonNia do bangso Israel dohot horong ni si Harun.

¹³ Sude halak na pasangap Ia, na menek sanga na magodang, giot pasupasuonNia.

¹⁴ Sai dilehen Tuhan ma di hamu dohot anak sisuan bulu, sai mur martamba-tamba ma nian pomparanmunu.

¹⁵ Sai dipasupasu Tuhan ma hamu nian, sitompa langit dohot tano on!

¹⁶ Hum Tuhan do nampuna langit, tapi anggo tano on dilehen Ia do tu jolma.

¹⁷ Anggo Tuhan, nada pujion ni halak na mate, halak na dung manuat tu inganan na lungun i.

¹⁸ Tapi anggo hita na mangolu mandok tarimakasi do tuSia, saonnari ro di salolot-lolotna. Puji ma Tuhan!