MASMUR 110 - BIBEL JAMITA NA DENGGAN

Tuhan dohot raja na nitodoNia

¹ Didok Tuhan do tu tuanku, “Juguk ma ho di siamunKu, lopus tu na Hubaen angka musumu gabe sidege-degean ni patmu.”

² Sian Sion pabidangon ni Tuhan ma harajaanmu, markuaso ma ho di tonga-tonga ni angka musumu.

³ Di ari haroromu mardongan kuaso maju ma rayatmu sian na nionjar ni rohana mardongan habadiaan. Songon ombun manyogot-nyogot marroan angka doli-doli mandapotkon ho.

⁴ Madung marsumpa Tuhan, nada tarihonNia be mangulahi, “Ho do malim salolot-lolotna, mangihutkon aturan ni si Melkisedek.”

⁵ Di siamunmu do Tuhan, muda jabat muruk Ia, angka raja pe dironcohon Ia.

⁶ UhumonNia noma angka bangso, jorbut marragean angka bangke di galanggang ni porang. AbisanNia noma angka parkuaso na di tano on sudena.

⁷ Minum ma ho sian mual na di topi dalan, dung margogo, jombaanmu ma hamonangan.