MASMUR 109 - BIBEL JAMITA NA DENGGAN

Tangiang di bagasan hasusaan

¹ Hupuji do Ho ale Debata, ulang ma sai so Ho.

² Angke ro do parjahat dohot pargabus manyaroso au, pasarsarkon angka barita gabus salaho tu au.

³ Dipardokkoni halahi do angka na patubu hosom jana diporangi halahi au haru so adong dalanna.

⁴ Haru pe huhaholongi halahi jana hutangiangkon, tapi laing dialo halahi do au.

⁵ Hajahaton do dibaen halahi balos ni hadenggananku, jana goyak ni roha balos ni holong ni rohangku.

⁶ Padiar ma halak na jurngit mangadili musungki jana diuhumi alona sandiri.

⁷ Padiar ma diadili jana tardapot di hasalaanna salang tangiangna pe etongon ma i dosana.

⁸ Sai tibu nian marujung ngolu ni i, jana dibuat halak na asing jabatanna i.

⁹ Padiar tinggal menek angka dakdanakna, jana mabalu na nibuatna.

¹⁰ Sai gabe pangido-ido nian angka dakdanakna jana mompas-ompas, jana diusir sian sego-sego ni ingananna.

¹¹ Padiar ma disita angka parsingir sinadonganna, jana suha ni halolojana pe dirampas halak na asing ma.

¹² Sai ulang adong na burju halak tusia, sanga manghaholongi dakdanak na nitadingkonna i.

¹³ Sai dirampas hamatean i ma sude pomparanna, jana dihalupahon sundut na mangihut goarna.

¹⁴ Sai diingot Tuhan ma hajahatan ni ompuna, jana ulang nian diampuni dosa ni inana i sapanjangna.

¹⁵ Sai diingot Tuhan ma tongtong dosa ni halahi, anso ulang adong na mangingot halahi di tano on.

¹⁶ Angke antong nada jungada diingot halahi, laho patuduhon holong ni roha. Diparhanciti do halak na pogos dohot na dangol, dibunu halahi do halak na so margogo.

¹⁷ Dibaen sai mamurai ia, sai hona bura nian ia! Dibaen na so ra ia mamasumasu, sai ulang ma adong tusia pasupasu!

¹⁸ Anggo disia karejo na somal do na mamurai i, tarsongon na mamake pakeanna noma i. Padiar ma burai masuk songon aek tu pamatangna jana songon miak tu bagasan holi-holina.

¹⁹ Padiar ma songon pakean burania i manutupi ia, jana mangalilit ia songon pangalilit ni bobat.

²⁰ O Tuhan, dabu ma uhuman i tu musungku, tu halak na mandok hata na jat tu au.

²¹ Tapi hombar tu janjiMu, urupi ma au, ale Debata, Tuhanku palua ma au hara ni hadengganan dohot holong ni rohaMu.

²² Angke na pogos do au boti na dangol, jana rohangku pe marsingotngot.

²³ Na giot mago noma au, songon halinu borngin, dihirpaskon do au songon siapor.

²⁴ Humitir totku hara ni na marpuaso; sibukku pe tinggal lohot holi-holi noma.

²⁵ Madung gabe jaya au di halahi, mupir-upir ulu ni halahi marnida au.

²⁶ Urupi ma au ale Tuhan Debatangku, palua ma au, hombar tu holong ni rohaMu.

²⁷ Jadi gabe botoon ni musungku ma, Ho do na paluahon au.

²⁸ Haru pe diburai halahi au, tapi laing dipasupasu Ho do au. Padiar ma alongki ditaluhon, tapi anggo au, naposoMon, sai dipamoga ma nian.

²⁹ Padiar ma angka musungku dilingkup habilean, jana hahaila manggupgupi halahi songon bulusan.

³⁰ Marsora na gogo pio-pio au tu Ho, ale Tuhan, hupuji do Ho di tonga-tonga ni punguan ni bangsoMu.

³¹ Dibaen dibela jana dipalua Ho halak na pogos sian angka halak na mandabu uhum hamatean tusia.