MASMUR 107 - BIBEL JAMITA NA DENGGAN

BUKU PALIMAHON: MASMUR 107-150 Puji-pujian di hadengganan ni Tuhan

¹ “Mandok tarimakasi ma hamu tu Tuhan angke na burju do Ia, hot do holong ni rohaNia salolot-lolotna.”

² Dokkon ma songon i marpupu, ale hamu angka na dung dipalua sian hasusaan.

³ Dipalagut Ia sian angka luat, sian Habincaran dohot sian Hasundutan, sian Utara dohot sian Selatan.

⁴ Adong ma i na marpinda-pinda di padang na bidang, na so dapot dalan mulak tu inganan di kota.

⁵ Manguas halahi jana tangkuraparon mago sude na niarop ni rohana.

⁶ Di bagasan hasusaan, pio-pio do halahi tu Tuhan, jana dipalua Ia halahi sian hasompitan.

⁷ Mamolus sian dalan na lidang halahi ditogu Ia, tu inganan parmianan di sada kota.

⁸ Patut ma da antong halahi mandok tarimakasi dibaen sai holong roha ni Tuhan di halahi, dipatupa Ia angka hahomangan di halahi.

⁹ Angke dipaminum Ia halak na manguas, na male dipabutong Ia dohot hadengganan.

¹⁰ Adong ma i na puhung di hagolapan na tarhurung di bagasan hasusaan dohot bosi;

¹¹ angke mangalo halahi tu Debata, jana nada parduli di parenta ni Na Gumincat i.

¹² Patunda ni karejo na borat, halahi gale-gale; tinggang halahi jana nada adong na manogusa be.

¹³ Di bagasan hasusaan, pio-pio halahi tu Tuhan, jana dipalua Ia halahi sian hasompitan.

¹⁴ Dioban halahi ruar sian hagolapan; diponggolkon Ia rante ni halahi.

¹⁵ Patut ma da antong halahi mandok tarimakasi, dibaen tongtong halahi dihaholongi Tuhan, dipatupa Ia di halahi angka hahomangan.

¹⁶ Diparrumpakkon Ia angka pintu tumbaga, angka palang bosi diparropukkon Ia.

¹⁷ Adong ma i na marhancit hara ni angka dosana, jana hona siksa hara ni angka hasalaanna.

¹⁸ Gialan halahi paida-ida sipanganon, ajal ni halahi madung dumonok.

¹⁹ Di bagasan hasusaan, pio-pio halahi tu Tuhan, jana dipalua Ia halahi sian hasompitan.

²⁰ Dipamalum Ia halahi i dohot parentaNia, jana dipalua Ia halahi i sian kuburan.

²¹ Patut ma da antong halahi mandok tarimakasi, dibaen tongtong halahi dihaholongi Tuhan, dipatupa Ia di halahi angka hahomangan.

²² Padiar ma halahi mandok tarimakasi, jana maroban haul, mardongan ende-ende jop ni roha pabotohon karejo ni Tuhan.

²³ Adong muse ma i na markapal manaripari laut, manjalahi hangoluan marhite boniaga tu laut na bidang.

²⁴ Diida halahi angka pambaenan ni Tuhan, karejo hahomangan na nibaenNia di lautan.

²⁵ Hara ni parentaNia, ro ma topan na manggosa-gosa na mambaen ombak margalumbang.

²⁶ Manaek ma halahi lalu tu ginjang di awang-awang, santongkin nari diompaskon tu lung ni lautan. Magopu do ate-ate ni halahi hara ni parmaraan.

²⁷ Moncong halahi marandoalan songon na mabuk na so marroha na torang.

²⁸ Di bagasan hasusaan, pio-pio halahi tu Tuhan, jana dipalua Ia halahi sian hasompitan.

²⁹ Halisungsung na gasa-gasaon dipahohom Ia, angka ombak pe gabe demak.

³⁰ Sonang ma halahi, dibaen ombak madung salpu; dioban Ia halahi tu labuan na dituju.

³¹ Patut ma da antong halahi mandok tarimakasi, dibaen tongtong halahi dihaholongi Tuhan, dibaen Ia do di halahi angka hahomangan.

³² Di tonga-tonga ni bangsoNia dipatuginjang halahi hagodanganNia, jana dimaujana ni na tobang-tobang dipuji halahi Ia.

³³ Mahiang dibaen Ia angka batang aek lopus marigang, nada ro be aek sian baba ni mual.

³⁴ Tano na napu dibaen Ia gabe tano garoga, hara ni hajahatan ni jolma na manginganisa.

³⁵ Parhorsihan diuba Ia gabe ambar, tano na hiang dibaen Ia gabe mual ni aek.

³⁶ Dipadiar Ia maringanan halak na malean disi, dipungka halahi pajongjong sada kota baen inganan ni halahi.

³⁷ Disuani halahi bona ni anggur jana manyuani angka kobun, dipalagut halahi ma sian i, parbatuna mansai bahat.

³⁸ Dibasa-basahon Tuhan di halahi bahat anak, jana pahan-pahanan ni halahi pe sai mamopari.

³⁹ Dompak dipabile jana ditaluhon bangso ni Debata, mangkohom hara ni parhancitan dohot hasusaan,

⁴⁰ dipatutoru Tuhan angka na beteng ni halahi, disuru Ia marpinda-pinda halahi di padang na bidang jana na so adong dalanna.

⁴¹ Dipalua Ia halak na pogos sian hasusaanna, mur martamba dibaen Ia pomparan ni halahi songon pahan-pahanan.

⁴² Marjop ni roha partigor i marnidasa hape anggo parjahat dihuntam Ia pamanganna.

⁴³ Dipikiri halak na marroha ma sudena i jana dihaporsayai halahi ma holong ni roha na manongtong sian Tuhan i.