MASMUR 104 - BIBEL JAMITA NA DENGGAN

Puji-pujian di panompa

¹ Puji ma Tuhan, ale tondingku! Na godang situtu do Ho, ale Tuhan Debatangku! Marpakean hasangapan dohot hatongamon do Ho,

² maruloskon sinondang na torang do Ho. Dipahembang Ho do langit songon undung-undung,

³ diginjang ni aek di langit dipajongjong Ho bagasMu. Angka ombun do dibaen Ho karetaMu, na mardalan di ginjang ni habong ni alogo.

⁴ Dibaen Ho alogo suruanMu, dohot hilap gabe pangoloiMu.

⁵ Tohong do tano on dipajongjong Ho di ojahanna, gabe nada meol salolot-lolotna.

⁶ Dung i ditutupi Ho ma i dohot lautan, aekna i mambaen liput puncut ni angka dolok.

⁷ Di na nigorahonMu, marlojong aek i; umbege parentaMu, kehe ia mangompoti.

⁸ Sian dolok mardalan aek i songon na marlobian tu inganan na nipasingkopMu disia di rura an.

⁹ Ditontuhon Ho batas na so tola bolusonnia, anso ulang be mangulahi bonom tano on.

¹⁰ Haruar dibaen Ho mual ni aek di angka rura, sian holang-kolang ni angka dolok mamolus anak ni batang aek.

¹¹ Laho mangalehen minum sude binatang di ladang, lalu pasombu nguas ni angka halode harangan.

¹² Di lambungna i ma angka unggas mambaeni asarna; mangkulingi halahi di holang-kolang ni angka bulung-bulung.

¹³ Sian langit diduruskon Ho udan di dolok, dilehen Ho marlobi-lobian suha ni tano.

¹⁴ Dipatubu Ho duhut baen di pahan-pahanan, dohot di jolma sude ragam ni suan-suanan, anso tarbaensa marsuan-suanan,

¹⁵ jana na mangalehen aek ni anggur hasonangan, dohot miak zetun na mambaen tata bohina, maradu panganon na mangalehen hagogoan disia.

¹⁶ Bona ni sampinur di Libanon diaeki maradu bornokan, angka hayu na nisuanMu sandiri do i, ale Tuhan.

¹⁷ Marasari ma disi angka situmorus habong; di hayu sampinur i ma unggas onggang maringanan.

¹⁸ Angka dolok na gincat gabe inganan ni bedu; rigang ni batu i partabunian ni angka landuk.

¹⁹ Baen tanda ni hatiha dibaen Ho bulan, diboto mataniari do sanga sadihari ia lusut.

²⁰ Muda diparo Ho na golap, ari gabe borngin, jadi binatang panyoro pe antong humadeap ma pahae-pahulu.

²¹ Angka singa jara-jara marngaur manjalahi soroan, mangido sipanganon sian Debata.

²² Muda bincar mataniari, marmulakan halahi jana marmodoman di inganan partabunianna i.

²³ Jadi haruar ma jolma laho markarejoi, jana torus marpadot lopus potang ari.

²⁴ Na bahat ma antong parkarejoanMu, ale Tuhan, gok tano on dohot sude na NitompaMu. Dibaen Ho sudena i marhite hamaloonMu sandiri.

²⁵ Ligi ma bidang ni laut na hembang i dohot angka binatang na so taretong na menek dohot na godang disi.

²⁶ Disi marmayami Lewiatan na nijadihonMu angka kapal pe marlayar pahae-pahulu.

²⁷ Ho do pos ni roha ni halahi sude anso laing dapotan sipanganon di hatihana be.

²⁸ Jana panganon na nipasingkopMu pe, dipangan halahi do i lopus butongan be.

²⁹ Muda manaili Ho tu pudi, mabiar be ma halahi; muda dibuat Ho hosana i, mago noma halahi mulak muse ma halahi, gabe orbuk songon di mulana i.

³⁰ Tapi muda disuru Ho tondiMu, hona tompa ma halahi dilehen Ho ngolu na imbaru tu portibi on.

³¹ Sai marmulia ma Tuhan salolot-lolotna, sai jop ma rohania marnida sude na nitompaNia!

³² Ditatap Ia tu tano on jana humitir ma i dibaen Ia, digoit Ia angka dolok gabe ruar ma timusna.

³³ Giot marendei do au di Tuhan salolot ni ngolungku, mamuji-muji au di Debatangku sapanjang au mangolu.

³⁴ Sai tumbuk nian endengki di rohaNia angke Ia do mambaen rohangku marmoga-moga.

³⁵ Padiar ma mago anggo pardosa sian tano on, padiar ma parjahat i abis dipusai. Puji ma Tuhan, ale tondingku! Puji ma Tuhan!