MASMUR 101 - BIBEL JAMITA NA DENGGAN

Janji ni sada raja

¹ Giot marende do au di Ho, Tuhan, taringot tu habonaran dohot hatigoran do endengku.

² Giot mangolu au nian so targora andigan pe Ho ro tu iba? Giot badia do ngolungku di bagasku,

³ hajahatan nada padiaronku. Huhagigihon do parbuatan ni halak na balik, nada ra au marsiantoan dohot halahi.

⁴ Hupasiding hagedukan jana mandao do au sian hajahatan.

⁵ Halak na mamurai di na buni, pasidungonku noma i. Halak na sombong dohot siginjang roha nada huhagioti.

⁶ Mida halak na haposan, jop do rohangku; tola do halahi maringanan di bagasku. Halak na so targora di ngoluna tola ma mangoloi iba.

⁷ Anggo pangicu nada tola maringanan di bagasku, halak pangalancap nada tahan di jolongku.

⁸ Sian ari tu ari sai hupusai sandok halak na jahat di luat on. Sude halak na mambaen hajahatan, pangabisonku ma i sian Kota Ni Tuhan.