JUNUS 3 - BIBEL JAMITA NA DENGGAN

Dioloi si Junus ma Tuhan

¹ Mangkuling ma Tuhan padua nolihon tu si Junus.

² Didok Ia ma, “Kehe ma ho tu Ninive, kota na godang i, jana palalu ma tu pangisi ni kota i tona na Hulehen tu ho.”

³ Jadi dioloi si Junus ma Tuhan jana kehe ma ia tu Ninive, i ma sada kota na godang situtu; jabat do angkon adong tolu ari laho mandalanisa.

⁴ Masuk ma si Junus tu kota i jana dung didalani ia sasadari mamungka ma ia marjamita, ning ia ma, “Opat pulu ari nari, maronco ma Ninive!”

⁵ Halak Ninive porsaya tu Debata, dung i diumumkon ma puaso jana angka halak na magodang sangape dakdanak mamate abit paboa marsak ni roha.

⁶ Di na tarbege tu raja ni Ninive barita i, manigor mijur ma ia sian habangsania. Dibuka ia ma baju harajaonnia i jana dipake ia ma abit goni, lalu juguk ma ia di abuan.

⁷ Marhite parenta ni raja dohot angka pamimpinna dipabotohon halahi ma boa-boa on tu halak Ninive songon on, “Jolma dohot pahan-pahanan, lombu dohot biri-biri nada tola mangankon sanga aha, nada tola mangan ruput jana nada tola minum aek.

⁸ Jolma dohot pahan-pahanan angkon mamake abit goni. Songon tanda ni panyolsolion angkon martangiang sude jolma sian situtu ni rohana tu Debata. Angkon padengganonna be pangalahona na jahat i dohot parangena na gok dosa i.

⁹ Betak na ra do Debata manguba nietNia gabe nada muruk be, jadi nada tulus hita bunuonNia!”

¹⁰ Diida Debata ma sude pangalaho ni halahi i; diida Ia ma na dung ditadingkon halahi pangalaho ni halahi na jat i. Jadi gabe dipauba Ia ma haputusanNia i, gabe nada tulus be halahi hona uhum dibaen Ia.