JOSUA 7 - BIBEL JAMITA NA DENGGAN

Si Akan mambaen dosa

¹ Madung diparentahon Tuhan halak Israel bahaso na so tola buaton sada pe sian sandok na adong di Jeriko na angkon sisegohononkon. Hape nada dioloi parenta i. Adong ma sada bayo na margoar si Akan na mangalanggar parenta i, jadi gabe muruk situtu ma Tuhan tu halak Israel. (Amang ni si Akan goarna si Karmi jana ompungnia margoar si Zabdi na sian horong ni Marga Zerah na masuk tu Marga Juda.)

² Na disuru si Josua do di hatiha i piga-piga halak sian Jeriko tu Ai, i ma sada kota di Habincaran ni Betel, na di lambung ni Bet-Awen. Na disuru do halahi kehe laho manangkasi luat i. Dung sidung dipadalan halahi karejo i,

³ mulak ma halahi jana paboahon tu si Josua. Didok halahi ma, “Nada pola porlu hita sude kehe mamorangi Ai. Tar dua tu tolu ribu halak pe disuru. Ulang pola sude parangan i disuru tusi laho marporang, harana menek sajo do kota i.”

⁴ Jadi gabe hum tolu ribu halak do na kehe mangaroro kota i. Hape disosak halahi mundur.

⁵ Dikojar angka halak na sian Ai do halahi sian horbangan ni kota Ai sadao-daona lalu hona bunu sian halahi adong tolu pulu onom halak di rereng ni dolok. Jadi gabe mabiar ma angka halak Israel jana gamang.

⁶ Songon i noma arsak ni si Josua dohot angka pamimpin ni Israel jabat disibak-sibak halahi pakean ni halahi jana sadari i lopus tu borngin sai manungkap ma halahi di jolo ni Poti Parjanjian ni Tuhan marsibaen abuan tu ulu ni halahi be tanda ni siluluton i.

⁷ Didok si Josua ma tu Tuhan, “O Tuhan Debatangku! Aha dehe gunana Ho maroban hami tu bariba ni Jordan on? Adong he na giot pasahatkon hami do tu angka halak Amori? Anso mate do hami? Dumenggan hian ma hami laing tinggal di bariba ni Jordan!

⁸ O Tuhan! Madung diayak musu i angka halak Israel sumurut. Saonnari aha noma sidokkononku?

⁹ Tarbege ma pangalaho on tu angka halak Kanaan dohot tu sude angka jolma na asing. Hobuhon ni halahi ma hami jana bunuonna ma hami sudena! Dung i aha dope sibaenonMu laho mampartahankon padenggankon goarMu na sangap i?”

¹⁰ Dialusi Tuhan ma si Josua, “Jongjong ma ho! Biasi sai manungkap ho?

¹¹ Na mardosa do halak Israel. Madung Huparentahon tu halahi laho mangoloi parjanjian antara ni halahi dohot Au hape dilaosi halahi do i! Angka barang-barang sironcohononkon pe laing adong do dibuat halahi. Ditangko jana dibunihon halahi do i di antara ni barang-barang ni halahi, jana dipaula so diboto halahi ma i!

¹² On ma dalanna umbaen na so tahan halahi mangadopi musu i. Sumurut pe halahi dibaen musu i harana na dung didabu do uhuman tu halahi sandiri anso dironcohon. Nada dongananKu be hamu anggo so dironcohon dope angka barang na so sibuaton i.

¹³ Saonnari jongjong ma ho Josua! Paias ma halak Israel jana suru ma halahi hobas laho mangadop tu Au. Parentahon ma halahi anso markobas-hobas ancogot, harana Au Tuhan Debata ni Israel, giot mandok tu halahi songon on: ‘O hamu angka halak Israel! Angka barang-barang na dung Huparentahon tu hamu angkon dironcohon, adong deba di hamu. Painte so diambungkon hamu angka barang-barang i, nada tarbaen hamu martahan mangalo musu i!’

¹⁴ Hara ni i Josua, paboa ma tu halahi bahaso na giot paresoon ma ancogot manyogot marmarga-marga. Muda Hutudu sada horong, sude marga na masuk tu horong i angkon maju marmarga-marga. Jana Hutudu sada marga sian horong i, sude ripe sian marga i angkon maju marsasaripe. Dung i muda Hutudu sada ripe, ganop halak sian na saripe i angkon maju marsada-sada halak.

¹⁵ Dung i halak na hutudu jana torang manyimpan angka barang na so tola i, angkon ditutung abis rap dohot sude dongan sabagasna maradu sude sinadonganna; angka i ma halakna na mangalaosi Poti Parjanjian ni Tuhan i jana na parohon habilean na godang tu halak Israel.”

¹⁶ Ancogotna i sogot sajo dope, dipaadop si Josua ma halak Israel tu Debata, marhorong-horong; gabe hona ma Marga Juda.

¹⁷ Dung i dipaadop si Josua ma horong Juda marsasamarga; jana hona ma Marga Zerah. Dung i dipaadop si Josua ma Marga Zerah marsasaripe, jana hona ma ripe ni si Zabdi.

¹⁸ Dung i dipaadop si Josua ma ripe ni si Zabdi marsasahalak, jadi hona ma si Akan anak ni si Karmi, pahompu ni si Zabdi.

¹⁹ Didok si Josua ma tu si Akan, “Ale anak hasian! Oku jana dokkon ma torus torang di jolo ni Tuhan, Debata ni Israel, sanga aha na nibaenmu. Paboa ma tu au, ulang bunihon.”

²⁰ “Tutu do i,” ning si Akan, “Madung hubaen dosa maradopkon Tuhan, Debata ni Israel. Songon on ma na dung hubaen:

²¹ Sian tonga-tonga ni angka barang na tarampas i, adong huida sada baju juba Babilonia na jeges sajo; huida muse perak hira-hira borat dua kilogram dohot sere sabatang marborat lobi satonga kilogram. Por sajo rohangku anso di au nian angka barang i, jadi gabe hubuat ma i. Hutabunihon do sudena i di bagasan tano di bandarki; perakna i ma di bagian partoru.”

²² Diompoti si Josua ma marsuru halak tu bandar ni si Akan. Tutu ma antong ditabunihon di bandar ni si Akan sude angka barang-barang na so tola i, jana perakna i ma partoru situtu.

²³ Dibuat halahi ma angka barang i jana dioban tu si Josua maradu tu sude halak Israel. Dung i dilehen ma angka barang i tu Tuhan.

²⁴ Dung i ditangkup si Josua dohot sude rayat ni Israel i ma si Akan jana dioban ma ia tu Rura Akor dohot sude anaknia, lombu pahan-pahanannia, halode dohot angka biri-birina, bandarna maradu sude sinadongannia bope perak, baju juba dohot sere na nitangkonia i.

²⁵ Dung i didok si Josua ma tu si Akan, “Biasi dialapi ho hasusaan tu hita? Saonnari paroon ni Tuhan ma hasusaan tu ho.” Jadi sude ma halak Israel mandangguri si Akan dohot batu lopus mate. Dongan sabagasnia pe dohot sude arta sinadongannia didangguri ma dohot batu jana abis ditutung.

²⁶ Dung salpu i, ditimbun halahi ma inganan i dohot batu bahat sajo. Laing disi dope angka batu i lalu tu saonnari. I ma dalanna umbaen laing digoari inganan i Rura Akor. Jadi gabe mombun ma muruk ni Tuhan.