JOSUA 6 - BIBEL JAMITA NA DENGGAN

Hadadabu ni Jeriko

¹ Madung togu dijago anggo angka horbangan ni kota Jeriko jana digoruk damos anso ulang tarbaen halak Israel masuk. Sada halak pe nada dipatola masuk sanga haruar sian kota i.

² Didok Tuhan ma tu si Josua, “Saonnari Hupasahat ma tu ho Jeriko dohot rajana i dohot sude tentarana angka na gogo i.

³ Angkon marbaris ho dohot paranganmu manghaliangi kota i sanoli sadari di bagasan onom ari.

⁴ Pitu halak malim na maroban sada be sarune, angkon mardalan di jolo ni Poti Parjanjian i. Di ari papituhon angkon hulianganmu dohot paranganmu kota i pitu noli jana ombuson ni angka malim ma sarunena i.

⁵ Dung i angkon paluon ni angka malim i ma sarune i ginjang sorana. Disi dibege hamu sora na ginjang i, angkon marsurak ma gogo sude halaklahi, jadi gabe matolbak ma tembok ni kota i. Jadi angkon manigor masuk ma sude tentara i tu kota i.”

⁶ Jadi dipiohon si Josua ma angka malim jana didok ia ma, “Buat hamu ma Poti Parjanjian i, angkon mardalan di jolo ni Poti Parjanjian i pitu halak sian hamu na mamalu sarune.”

⁷ Dung i disuru si Josua ma marbaris parangannia i manghaliangi kota i, dijoloi barisan ni pangawal na parjolo na mardalan manjoloi Poti Parjanjian ni Tuhan i.

^8-9 Songon na niparentahon ni si Josua, mardalan ma barisan pangawal na parjolo manjoloi angka malim sipalu sarune. Diihutkon angka malim na mamorsan Poti Parjanjian ni Tuhan sian pudi, dung i parpudi ma barisan ni pangawal parpudi. Jadi di na mardalan halahi, torus ma sarune i dipalu.

¹⁰ Madung jolo diparentahon sude parangan i na so tola marsurak jana sahata pe nada tola dokkononna salolot so dilehen si Josua parentana.

¹¹ Songon i ma disuru si Josua parangannia maroban Poti Parjanjian i manghaliangi kota i sanoli, lalu mulak tu parbandaran jana marborngin disi.

^12-13 Ancogotna i sogot sajo dope, ngot ma si Josua jana marbaris ma padua nolina angka malim dohot tentara i manghaliangi kota i songon parjojor ni barisan na di ari parjolo i: Mula-mula barisan ni pangawal parjolo, dung i pitu halak malim siombus sarune, diihutkon angka malim na mamorsan Poti Parjanjian jana ujungna barisan pangawal na parpudi. Laing torus ma anggo sarune i dipalu.

¹⁴ Di ari paduahon i dihaliangi halahi do kota i sanoli, lalu mulak tu parbandaran. Songon i ma dibaen halahi ganop ari salolot onom ari.

¹⁵ Di ari papituhon ngot ma halahi di na mamungka bincar mataniari, lalu dihaliangi halahi ma kota Jeriko i sarupa dohot na parjolo i, tapi hum di na sadari i do kota i dihaliangi halahi pitu noli.

¹⁶ Di na papitu nolihon i, disi dipalu angka malim sarunena i, dibaen si Josua ma parentana tu sude parangan i anso marsurak. Didok si Josua ma, “Madung dipasahat Tuhan kota on tu hamu!

¹⁷ Sude kota i dohot sandok isina angkon dironcohon sude gabe songon haul tu Tuhan. Hum si Rahab, siboru jalang i dohot koum sisolkotna sajo do na tola padiaron mangolu, dibaen madung diondihon ia mata-mata na tasuru i.

¹⁸ Nada tola buatonmunu sanga na aha pe sian na patut sironcohononkon. Muda dibuat hamu i, ro ma parmaraan mandondoni parbandaran ni Israel.

¹⁹ Sude barang-barang na sian perak, sere, tumbaga dohot bosi angkon paasingon do i di Tuhan. Angkon nioban sudena i tu bagasan inganan panyimpanan ni arta ni Tuhan.”

²⁰ Jadi diombus angka malim ma sarunena. Jana disi dibege angka halak Israel sora ni sarune i marsurak ma halahi sagogona, jadi gabe matolbak ma tembok ni kota Jeriko i. Manigor manangkok ma tentara ni Israel tu dolok jana masuk tu kota i mangarampassa.

²¹ Sude halak na adong di kota i, na tobang na poso, halaklahi dadaboru dibunu do sude dohot podang. Sude pahan-pahanan lombu, biri-biri dohot halode pe dibunu.

²² Didok si Josua ma tu mata-mata sidua halak i, “Kehe ma hamu tu bagas ni boru jalang i jana oban hamu ma ia haruar rap dohot koum sisolkotnia songon na dung nijanjihonmunu hian tusia.”

²³ Jadi kehe ma mata-mata sidua halak i jana dioban halahi ma si Rahab haruar rap dohot ama-inania, angka ibotona dohot koum sisolkotnia na deba nari. Dioban ma sude sisolkot ni si Rahab maradu angka hatobanna tu ruar tu inganan na aman di lambung parbandaran ni Israel.

²⁴ Dung i disurbu tentara ni Israel ma sude kota i dohot sude na adong di bagasanna, asing sian angka barang sere, perak, tumbaga dohot angka barang na sian bosi. Dibuat halahi do angka barang-barang i jana dioban tu inganan panyimpanan ni arta nampuna ni Tuhan.

²⁵ Tapi anggo si Rahab siboru jalang i dohot koum sisolkotna dipadiar si Josua do mangolu, hara ni na niondihonnia mata-mata sidua halak i na nisuru ni si Josua tu Jeriko. (Lopus tu sadari on laing tinggal do pomparan ni si Rahab di Israel.)

²⁶ Diparuar si Josua do di hatiha i larangan songon on, “Sanga ise na mancubo giot mambangun kota Jeriko on mangulahi, hona bura ni Tuhan do i. Sanga ise na mamayakkon ojahanna gabe agoan anak siangkaan; jana sanga ise na mamasang angka pintu ni horbanganna i gabe agoan anak sianggianna.”

²⁷ Didongani Tuhan do si Josua, jana tarbonggal situtu ma goar ni si Josua di sandok luat i.