JOSUA 5 - BIBEL JAMITA NA DENGGAN

¹ Dibege sude raja-raja ni Amori na di Hasundutan ni Batang aek Jordan, dohot sude angka raja ni Kanaan na di topi ni Laut Tonga ma, na nipahiang ni Tuhan Batang aek Jordan salolot mamolus halak Israel di batang aek i lopus lalu halahi di bariba. Jadi gabe mabiar ma angka raja i jana humitir hara ni halak Israel.

Marsunat di Gilgal

² Dung i didok Tuhan ma tu si Josua, “Baen ma piso sian batu, lalu sunati ma halak Israel.”

³ Dibaen si Josua ma songon na niparentahon ni Tuhan tusia. Disunat si Josua ma angka halak Israel di inganan na margoar Dolok Panyunatan.

⁴ Harana dikarejohon pe i, baen na dung sude do halaklahi na dung bisa marporang na haruar sian tano Mesir, madung mate salolot di pardalanan di parhorsihan i.

⁵ Di hatiha na haruar angka halak Israel sian Mesir, na dung marsunat do sude angka halaklahi di halahi. Tapi di na madang-adang angka halak Israel di parhorsihan opat pulu taon honokna, sada halak pe sian dakdanak ni halahi halaklahi nada adong dope na disunat.

⁶ Boti muse, angka halaklahi na haruar sian Mesir na dung tuk umurna masuk tentara, di ujung ni ombas siopat pulu taon i madung mate sudena patunda ni na so mangoloi parenta ni Tuhan. Jana hombar tu sumpa ni Tuhan, nada diisinkon Tuhan halahi marnida tano na makmur jana na napu i na nijanjihon ni Tuhan tu ompu na umpompar halahi.

⁷ Angka anak halaklahi ni na dung marmatean i sudena nada unjung dope disunat. Sundut na imbaru on ma na nisunat ni si Josua i.

⁸ Dung sidung halahi sude disunat, tinggal di parbandaran ma sandok rayat ni Israel lopus malum sude bugang ni halahi i.

⁹ Didok Tuhan ma tu si Josua, “Sadari on Huagohon ma sude habileanmunu na gabe hatoban di Mesir.” I ma dalanna umbaen margoar inganan i Gilgal lalu tu sadari on.

¹⁰ Taran na marbandar di Gilgal di napa na di lambung Jeriko, dipestahon halak Israel ma Paskah di borngin ni tanggal opat bolas di bulan i.

¹¹ Ancogotna i, disi ma parjolo situtu halahi mangankon sipanganon sian hasil ni tano Kanaan, i ma: Roti na so marragi dohot gandum na nipanggang.

¹² Laing di na sadari i ma nada mangan manna be halak Israel, dibaen nada adong be dipaijur sian langit. Jana mamungka sian hatiha i, hasil ni tano Kanaan noma dipangan halahi.

Si Josua dohot sada bayo na marsinjata podang

¹³ Jadi dompak di lambung ni Jeriko si Josua, ompot ma diida ia sada bayo na jongjong di jolonia manyintak podang. Didapotkon si Josua ma bayo i lalu disapai ia, “Dongan dehe ho sanga na alo?”

¹⁴ “Nada dongan, jana nada alo,” ning bayo i mangalusi. “Panglima ni tentara ni Tuhan do au dison.” Manungkap ma si Josua, marsomba jana didok ia ma, “Aha do na giot dohonon ni Tuanku di naposomon?”

¹⁵ Dialusi panglima ni tentara ni Tuhan i ma, “Buka sipatumi, tano na badia do tano na nijongjonganmi.” Jadi gabe dibuka si Josua ma sipatunia.