JOSUA 4 - BIBEL JAMITA NA DENGGAN

Dipajongjong dua bolas batu parningotan

¹ Dung di bariba sude bangso i, didok Tuhan ma tu si Josua,

² “Pili ma dua bolas halak, sahalak sian ganop marga.

³ Parentahon ma tu halahi mambuat dua bolas batu sian tonga-tonga ni Batang aek Jordan on, tumbuk di hajongjongan ni angka malim i. Suru ma dioban halahi batu i lopus tu inganan parbandaranmunu annon borngin.”

⁴ Jadi dipio si Josua ma sidua bolas na tarpili i,

⁵ lalu didok ia ma, “Kehe ma hamu tu Jordan, tu jolo ni Poti Parjanjian ni Tuhan Debatamunu. Porsan hamu ma sian i sada be batu di abaramunu – sada be batu di ganop marga ni bangso Israel.

⁶ Angka batu i ma na paingotkon halak Israel tu na nibaen ni Tuhan. Dilaon-laon ni ari muda sapa-sapa angka dakdanakmunu sanga aha arti ni angka batu on di hamu,

⁷ paboa hamu ma tu halahi bahaso na jungada mahiang Batang aek Jordan on di na dioban Poti Parjanjian ni Tuhan manaripari batang aek i. Sai na paingoton ni angka batu on do halak Israel tu pangalaho na masa dison.”

⁸ Dibaen sidua bolas halak i ma na niparentahon ni si Josua i. Jana hombar tu na nidok ni Tuhan tu si Josua, dibuat halahi ma dua bolas batu sian tonga-tonga ni Batang aek Jordan, sada be ganop marga ni Israel, lalu marobansa tu inganan parbandaran ni halahi.

⁹ Di tonga-tonga ni Jordan i muse, disusun si Josua ma dua bolas batu diinganan hajongjongan ni angka malim na mamorsan Poti Parjanjian i. (Laing disi dope angka batu i lopus tu sadari on.)

¹⁰ Anggo angka malim i laing jongjong do di tonga-tonga ni Jordan lopus sidung angka halahi patuluskon sude na niparentahon ni Tuhan tu halahi marhite si Josua. Laing hombar do sudena i tu na nidok ni si Musa tu si Josua. Horas do halak Israel manaripari batang aek i.

¹¹ Dung lalu halahi sude tu bariba, mardalan ma muse angka malim na maroban Poti Parjanjian ni Tuhan i di jolo ni bangso i.

¹² Angka parporang ni Marga Ruben, Gad dohot satonga sian Marga Manase, mardalan ma di jolo ni sude bangso i maniop sinjata, songon na nidok ni si Musa karejohonon ni halahi.

¹³ Hira-hira opat pulu ribu halak ma na taripar lalu tu napa ni Jeriko giot marporang di jolo ni Tuhan.

¹⁴ Dibaen Tuhan ma di ari i angka pangalaho na mambaen bangso Israel manjujung si Josua gabe halak na godang. Dipasangap halahi ma si Josua, salolot mangolu ia songon na diparsangapi ni halahi si Musa.

¹⁵ Disuru Tuhan ma si Josua

¹⁶ mamarentahon angka malim na mamorsan Poti Parjanjian i anso ruar sian Jordan.

¹⁷ Dibaen si Josua ma na niparentahon ni Tuhan i tusia.

¹⁸ Disi lalu angka malim i tu topi ni batang aek i, mamungka ma mardalan aek i mangulahi songon na somal jana bubung ma batang aek i.

¹⁹ Di tanggal sampulu bulan parjolo ma halak Israel lalu di bariba ni Jordan. Dung i marbandar ma halahi di Gilgal di Habincaran ni Jeriko.

²⁰ Disi ma disusun si Josua sidua bolas batu na dibuat sian Jordan i.

²¹ Dung i ninna si Josua ma tu halak Israel, “Di pudian ni ari, muda disapai angka dakdanakmunu taringot tu arti ni angka batu on,

²² tama do caritohononmunu tu halahi na masa taringot tu halak Israel na manaripari Batang aek Jordan on di ginjang ni tano na mahiang.

²³ Caritohon hamu ma tu angka dakdanakmunu i bahaso na nipahiang ni Tuhan Debatamu Batang aek Jordan di hamu lopus lalu hamu sude di bariba, laing songon Laut Rara na nipahiangnia di hamu.

²⁴ Marhite na masa on gabe botoon ni sude jolma na di tano on ma sanga songon dia godangna kuaso ni Tuhan. Jana pasangaponmunu ma Tuhan Debatamunu salolot-lolotna.”