JOSUA 22 - BIBEL JAMITA NA DENGGAN

Disuru mulak angka marga na di Luat Habincaran tu tanona

¹ Dung i disuru pio si Josua ma angka halak na sian Marga Ruben, Gad dohot Manase Parhabincaran anso marlagut.

² Lalu didok ia ma tu halahi, “Madung dipatulus hamu, sasude na nitonahon ni si Musa naposo ni Tuhan sibaenonmunu, jana madung dioloi hamu muse sude na huparentahon.

³ Nada jungada dipadiar hamu sahonokna on angka kahanggimunu sabangso Israel mamunjung marporang. Jana madung dioloi hamu angka parenta ni Tuhan sian situtu ni rohamunu.

⁴ Antong, domu tu na dijanjihonNa i, madung dilehen Tuhan Debatamunu i hasonangan tu angka kahanggimunu sabangso. Jadi saonnari, mulak ma hamu tu tanomunu sandiri, na di Habincaran ni Batang aek Jordan i, na nilehen ni si Musa najolo tu hamu.

⁵ Jana ingot hamu ma! Sipatulusonmunu do uhum na nisuru ni si Musa oloanmunu, i ma: Haholongi ma Tuhan Debatamu, ihutkon ma giotNia, oloi ma angka parentaNa, setia ma ho, jana unduk ma ho mangoloi sian sude rohamu dohot sude tondimu.”

⁶ Dung i disuru si Josua ma halahi mulak jana dipasupasu ia. Jadi mulak ma halahi tu parbandaranna.

⁷ Salaho tu Marga Manase na satonga i, madung dilehen si Musa do bagian ni halahi di Basan, tapi tu na satonga nari dilehen si Josua tano na di Hasundutan Batang aek Jordan rap dohot angka kahanggina.

⁸ Dung i didok si Josua ma songon on, “Saonnari mulak ma hamu dohot maroban bahat sinadongan, bahat pahan-pahananmunu, bahat perak, sere, tumbaga dohot bosi jana bahat pakean. Antong, silehenonmunu do sanga aha na nirampasanmunu sian angka musumunu i tu angka dongan samargamunu.”

⁹ Jadi mulak ma Marga Ruben, Gad dohot Marga Manase Parhabincaran tu tano ni halahi. Ditadingkon halahi ma halak Israel na asing i di Silo na di tano Kanaan, lalu kehe ma halahi tu tano ni halahi sandiri, i ma tano Gilead. Hara ni parenta ni Tuhan markite-hite si Musa do diingani halahi tano i.

Langgatan na di lambung ni Batang aek Jordan

¹⁰ Di na lalu Marga Ruben, Gad dohot Manase Parhabincaran di Gelilot, – di Hasundutan ni Batang aek Jordan dope i – dipajongjong halahi ma sada langgatan na godang jana na tongam di lambung ni batang aek i.

¹¹ Jadi gabe sar ma hata-hata on di tonga-tonga ni halak Israel, “Madung dipajongjong angka halak sian Marga Ruben, Gad dohot Manase Parhabincaran sada langgatan di Gelilot, di bagian ni luatta di lambung ni Batang aek Jordan!”

¹² Di na tarbege tu angka halak Israel barita i, marroan ma halahi sude marlagut di Silo laho mamorangi angka marga ni Israel na di Habincaran ni Batang aek Jordan i.

¹³ Jadi diutus halak Israel ma si Pinehas anak ni Malim Eleasar mandapotkon Marga Ruben, Gad dohot Manase Parhabincaran di tano Gilead.

¹⁴ Laing dohot muse do sampulu halak angka pamimpin ni bangso Israel mandongani si Pinehas – sahalak sian ganop marga na di Hasundutan ni Batang aek Jordan – i ma kapala ripe sian angka marga ni halahi.

¹⁵ Jadi lalu ma halahi mandapotkon angka halak na sian Marga Ruben, Gad dohot Manase Parhabincaran di tano Gilead.

¹⁶ Jadi songon gonti ni sude halak ni Tuhan, didok halahi ma tu halak na sian Marga Ruben, Gad dohot Manase Parhabincaran i, “Biasi baenonmunu pangalaho na jahat on maradopkon Debata ni Israel? Na mangalo Tuhan do hamu, di na nibaenmunu langgatan di hamu! Nada dipatulus hamu be angka na niparentahonNia!

¹⁷ Adong he na so diingot hamu be lakna dosanta na di Peor? Hona uhum hita dibaen Tuhan marhite sada bala, haru pe hita bangsoNia sandiri! Salang lopus tu sadari on pe laing tataon panginonaanna. Laing na so tuk dope i lakna?

¹⁸ Jana saonnari, na giot manghudukkon Tuhan dope hamu mangulahi? Muda dialo hamu Tuhan sadari on, muruk ma Tuhan ancogot tu sude halak na di Israel.

¹⁹ Antong hara ni i, muda na so patut do luatmunu i baenon gabe inganan marsomba tu Tuhan, pinda ma hamu tuson tu tano ni Tuhan, di inganan ni Bandar Parmianan Ni Tuhan. Pangido hamu ma deba luatnami on, tapi ulang antong alo hamu Tuhan, sanga mambaen hami mangalo Tuhan marhite na pajongjongkon sada langgatan na asing, angke na dung adong do antong langgatan ni Tuhan Debatanta.

²⁰ Ingot ma! Si Akan anak ni si Zerah i pe na so ra mangihutkon parenta ni Tuhan salaho tu barang-barang sisoadahononkon. Jana aha do akibatna? Sude Israel hona uhum! Hum si Akan do na mardosa, hapengani anggo na mate nada hum ia sajo!”

²¹ Dialusi halak na sian Marga Ruben, Gad dohot Manase Parhabincaran i ma tu angka kapala ni marga-marga Israel na sian Hasundutan ni Batang aek Jordan i,

²² “Debata do Na Sun Markuaso! Ia do Tuhan! Debata do Na Sun Markuaso! Ia do Tuhan! Diboto Ia do sanga hara ni aha umbaen na hami patupa pangalaho on jana giotnami pe ulang so dohot hamu nian umbotosa! Sugari na tutu hami baen pangalaho i mardongan maksud mangalo Tuhan sanga hara ni na so porsaya be hami tuSia, bunu hamu ma hami saonnari!

²³ Muda na tutu ma hami nada mangihutkon parenta ni Tuhan marhite na pajongjong langgatannami sandiri laho manghaulkon haul situtungon sanga laho manghaulkon haul gandum sanga haul haluaan di ginjangna i, sai Tuhan i sandiri ma na manguhumi hami.

²⁴ Nada, hamu angka dongan! Nada songon i maksudnami! Hami pajongjong pe langgatan i, hara ni na gamang do hami sanoli on di pudian ni ari dokkonon ni angka pomparanmunu tu pomparannami, ‘Nada adong sanga na aha parsambunganmunu tu Tuhan, Debata ni Israel!

²⁵ Ligi da, dibaen Tuhan do Batang aek Jordan on di tonga-tonganta, i ma na laho manyirang hami sian hamu angka halak Ruben dohot Gad. Tutu do na so adong bagi aha parsambunganmunu dohot Tuhan.’ Jana aha noma na tarjadi sanoli on? Mantak noma pomparannami i marsomba tu Tuhan baenon ni pomparanmunu i.

²⁶ Jadi, i do dalanna umbaen na hami pajongjong sada langgatan. Nada na laho tu haul situtungon sanga laho tu angka sihaulkononnami,

²⁷ tapi anso gabe tanda do i di hita na dua pihak, dohot di pomparanta tu pudian ni ari, bahaso na tutu do hami on marsomba tu Tuhan di Bandar ParmiananNia i marhite na maroban haul situtungon, angka sihaulkonon dohot haul haluaan. Jadi muda songon i, nada dohonon ni pomparanmunu be bahaso na so adong sanga na aha parsambungan ni pomparannami dohot Tuhan.

²⁸ Jadi anggo maksudnami songon on ma: Sugari sura didok pomparanmunu songon i, gabe bolas ma dohonon ni pomparannami, ‘Ligi da langgatan i! Na dipajongjong ni ompu na umpompar hami do sada langgatan na tudos songon langgatan ni Tuhan. Nada na giot tu haul situtungon sanga baen tu sihaulkonon, tapi na laho tanda do i di hita na dua pihak.’

²⁹ Pos ma rohamunu, nada ra hami anggo mangalo Tuhan sanga mantak hami mangoloi tuSia marhite na pajongjong langgatan na asing baen tu haul situtungon sanga haul gandum sanga sihaulkonon; angke madung adong do antong langgatan ni Tuhan Debatanta di jolo ni Bandar Parmianan Ni Tuhan.”

³⁰ Sude na nipajojor ni halahi na sian Marga Ruben, Gad dohot Manase Parhabincaran i, ditangihon Malim Pinehas do dohot sisampulu halak hatobangon ni rayat Israel na sian bagian Hasundutan ni Batang aek Jordan i. Jadi sombu ma pangkilalaan ni halahi umbege hatorangan i.

³¹ Dung i didok si Pinehas anak ni Malim Eleasar i ma tu angka halak Marga Ruben, Gad dohot Manase Parhabincaran i, “Saonnari hami boto ma na nidonganan ni Tuhan do hita, angke nada dialo hamu Tuhan. Madung dipalua hamu halak Israel sian uhuman ni Tuhan.”

³² Dung salpu i, kehe ma si Pinehas rap dohot angka hatobangon ni Israel i. Ditadingkon halahi ma angka halak Ruben, Gad i di Gilead, lalu mulak ma halahi tu Kanaan, dung i dipaboa halahi ma pangalaho i tu halak Israel.

³³ Jadi halak Israel pe sombu be ma antong salaho tu pangalaho i, gabe dipapuji-puji halahi ma Debata. Jana nada dihobari halahi be taringot tu niet ni halahi laho mamorangi angka halak Ruben dohot Gad, dohot na giot mangaroncohon luatna i.

³⁴ Ujungna didok Marga Ruben dohot Gad i ma, “Langgatan on ma na gabe saksi di hita sudena bahaso Tuhan do Debata.” Jadi gabe digoari halahi ma langgatan i “Saksi”.