JOSUA 20 - BIBEL JAMITA NA DENGGAN

Angka kota haporusan

¹ Dung i disuru Tuhan ma si Josua

² mandok tu halak Israel songon on, “Todo hamu ma angka kota haporusan; madung Hutonahon tu si Musa laho paboahon i tu hamu.

³ Sanga ise na mambunu halak sian na so sangajo, tola do marlojong tu kota i anso malua sian halak na giot palalu hosom tusia.

⁴ Tola do lojonganna tu sada sian angka kota i, lalu kehe ia mandapotkon pangadilan di pintu horbangan ni kota i, dung i patorangonnia ma disi tu angka pamimpin sanga aha na masa. Jadi gabe paloason ni angka pamimpin i ma ia masuk tu kota i jana dilehen inganannia, anso tarbaen ia tinggal disi.

⁵ Muda dikojar na giot palalu hosom i ia lalu tusi, nada tola lehenon ni halak kota i ia tu halak na giot palalu hosom i. Angkon jagoon ni halahi do ia, angke sian na so disangajonia do mamunu jolma, jana nada hara ni na goyak ni rohania marnida halakna i.

⁶ Tola do ia tinggal di kota i lopus diadili ia di jolo ni halak na bahat, jana lopus marujung ngolu ni halak na gabe Malim Godang di hatiha i. Dung salpu i tola ma ia mulak tu kotania, sian dia hian ia maporus.”

⁷ Jadi ditontuhon halak Israel ma angka na mangihut on gabe kota haporusan: Kedes di partoran Naftali na di Galilea, Sikem di partoran Efraim; dohot Hebron di partoran Juda.

⁸ Di Luat Habincaran ni Batang aek Jordan di parhorsihan na hornop pardolok na di Habincaran ni Jeriko, ditontuhon halahi ma kota haporusan angka na mangihut on: Kota Beser di Luat Ruben, kota Ramot di Gilead na di Luat Gad, dohot kota Golan di Basan luat ni Manase.

⁹ Angka i ma sude kota haporusan na ditontuhon di sandok halak Israel dohot di sude halak na asing na tinggal di tonga-tonga ni halahi. Sanga ise halak na mamunu jolma sian na so sangajo, tola ma lindungan di angka kota i sian halak na mangkojarsa na giot mamalos tusi; nada tola bunuon ia anggo so jolo diadili di adopan ni halak na bahat.