JOSUA 17 - BIBEL JAMITA NA DENGGAN

Manase Hasundutan

¹ Deba sian luat na di Hasundutan ni Batang aek Jordan dilehen tu sabagian marga-marga pomparan ni si Manase anak siangkaan ni si Josep. Si Makir ama ni si Gilead, ia ma anak siangkaan ni si Manase, na malo do ia marporang gabe dilehen ma disia Luat Gilead dohot Basan na di Habincaran ni Batang aek Jordan.

² Anggo luat na di Hasundutan ni Batang aek Jordan i dilehen tu angka marga na asing na sian pomparan ni si Manase do i, i ma marga: Abieser, Helek, Asriel, Sekem. Hefer dohot Semida; pomparan ni si Manase anak ni si Josep ma sudena i. Halahi ma angka kapala ni marga.

³ Si Hefer i ma anak ni si Gilead, jana amang ni si Gilead i ma si Makir anak ni si Manase. Anak ni si Hefer margoar si Zelafehad; nada adong anaknia halaklahi, hum borunia sajo do, i ma si Mahla, si Noa, si Hogla, si Milka dohot si Tirsa.

⁴ Kehe ma angka boru ni si Zelafehad on mandapotkon Malim Eleasar dohot si Josua maradu angka pamimpin, mandok, “Madung didok Tuhan tu si Musa, anggo hami angkon rap maruli do tano dos dohot angka ibotonami i.” Hara ni i, laing dilehen muse ma tano di angka boru ni si Zelafehad i laing songon iboto ni halahi songon na niparentahon ni Tuhan.

⁵ Hara ni i ma gabe sampulu bagian tano tu pomparan ni si Manase, asing sian tano Gilead dohot Basan na di bariba ni Batang aek Jordan.

⁶ Harana sude do borunia mandapot parbagian sarupa dohot bagian ni angka anak halaklahi. Tapi anggo tano Gilead parbagian ni sude Marga Manase ma i.

⁷ Anggo garis batas ni Manase mamungka ma i sian Aser lalu tu Mikmetat di sabola Habincaran ni Sikem. Sian i manuat ma garis i tu Selatan lopus tu Luat En-Tapuah,

⁸ tapi anggo kota Tapuah na di parbatasan, bagian ni Efraim do i.

⁹ Torus ma manuat garis batas ni Manase i lalu tu anak ni Batang aek Kana. Angka kota na di sabola Selatan ni anak ni batang aek i, bagian ni Efraim do, haru pe di bagasan tano ni Manase. Torus dope garis batas ni Manase i mangihutkon pardalan ni anak ni batang aek i adop Utara, lalu marujung di Laut Tonga.

¹⁰ Jadi songon i ma pangalahona Efraim di Selatan jana Manase di Utara, jana Laut Tonga ma batas ni halahi sabola Hasundutan. Anggo di Barat Laut, marbatas dohot Aser do luat ni Manase, jana di Timur Laut marbatas dohot Isakar ma luat i.

¹¹ Di holang-holang ni Luat Isakar dohot Aser adong do tano ni halak Manase, i ma: Bet-Sean dohot Jibleam dohot angka luat na humaliangna. Songon i muse: Dor (kota na di topi ni laut), Endor, Taanakh, Megido dohot angka luat na humaliangna.

¹² Tapi nada tolap Marga Manase paorotkon halak kota i; i do dalanna umbaen na laing hot halak Kanaan maringanan disi.

¹³ Salang di pudian ni ari dung gumogo halak Israel laing nada dipaorot halahi sude halak Kanaan, tapi dipaksa halahi do angka jolma i markarejo di halahi.

Mangido tamba parbagian tano Efraim dohot Manase Parhasundutan

¹⁴ Didok pomparan ni si Josep ma tu si Josua, “Biasi hum sabagian sajo tano i dilehen di hami. Hami sun do bahatna, dibaen dipasupasu Tuhan do hami.”

¹⁵ Dialusi si Josua ma, “Muda mabahattu hamu gabe masompittu do Dolok Efraim di hamu, antong kehe ma hamu tu luat ni angka halak Peris dohot Refaim. Pungka hamu ma angka inganan na imbaru di angka harangan ni halahi i.”

¹⁶ Dialusi pomparan ni si Josep i ma, “Nada tuk bolak ni luat partoran i di hami, hapengani bangso Kanaan na maringanan di angka tano na hornop na di lombang i pe markareta porang sian bosi do – i ma na maringanan di Bet-Sean dohot di angka luat na humaliangna, bope na maringanan di Rura Jisreel.”

¹⁷ Jadi didok si Josua ma tu Marga Efraim dohot Manase Parhasundutan i, “Tutu do i sibahat-bahat hamu boti na gogo. Jadi bagianmunu pe angkon lobi do sada.

¹⁸ Buat hamu ma luat partoran, angke haru pe laing harangan dope luat i, bolas do i bukaonmunu anso gabe hamu puna sudena i. Jana anggo taringot tu halak Kanaan i do, tarpaorot hamu do i haru pe gogo halahi jana markareta porang na sian bosi.”