JOSUA 13 - BIBEL JAMITA NA DENGGAN

Angka luat sibuaton dope

¹ Madung matobang situtu si Josua saonnari. Didok Tuhan ma tu si Josua, “Madung matobang ho, ale Josua! Hape bahat dope luat sibuaton:

² sude Luat Pilistin dohot Gesur,

³ dohot sude Luat Awi sabola Selatan. (Luat na mamungka sian Batang aek Sihor di parbatasan ni Mesir lopus tu parbatasan ni Ekron na di Utara – tano ni halak Kanaan do sudena taretong; jana raja-raja ni Pilistin maringanan di Gasa, Asdod, Askelon, Gat dohot Ekron.)

⁴ Angkon laing sirampason dope: Sude tano Kanaan dohot Meara (tano ni halak Sidon), lopus tu Afek na di parbatasan ni tano ni bangso Amori;

⁵ mangihut muse tano ni bangso Gebal dohot sude luat ni Libanon sabola Habincaran, sian Baal-Gad na di Selatan ni Dolok Hermon lopus tu dalan laho tu Hamat.

⁶ Dohot muse do sude luat ni angka halak Sidon na maringanan di antara ni angka dolok na di Libanon dohot kota Misrefot Maim.” Dung i ninna Tuhan dope tu si Josua, “Muda kehe muse halak Israel mamorangi, paorotonKu ma sude angka bangso i. Jana angkon bagi-bagihononmu do tano i tu halak Israel anso gabe halahi puna, songon na dung Huparentahon tu ho.

⁷ Antong, saonnari bagi-bagihon ma tano i tu sisambilan marga ni Israel na asing i dohot satonga sian Marga Manase, anso gabe tano bagian ni halahi i.”

Parbagi ni tano na di Habincaran ni Batang aek Jordan

⁸ Anggo Marga Ruben dohot Gad dohot satonga Marga Manase madung manjagit tano parbagian sian si Musa, naposo ni Tuhan i; i ma tano na di Habincaran ni Batang aek Jordan.

⁹ Masuk tu luat ni halahi ma Aroer (na di topi ni Batang aek Arnon), dohot kota na di tonga-tonga ni rura i, dohot muse sude luat na hornop inganan na timbo sian Medeba tu Dibon.

¹⁰ Torus ma i mabidang lopus tu luat parbatasan ni Amon, dohot sude angka kota na jungada dirajai si Sihon raja ni Amori na maringanan di Hesbon.

¹¹ Tano Gilead, luat na humaliang Gesur dohot Maaka dohot sude Dolok Hermon, dohot sude Luat Basan lopus tu Salka, sudena luat i laing masuk do i di bagasan bagian ni Marga Ruben, Gad dohot satonga Marga Manase.

¹² Laing dohot muse do masuk tu luat ni halahi, tano ni Raja Og, halak Refaim na parpudi mamarenta di Astarot dohot Edrei. Madung talu dibaen si Musa angka bangso i jana diusir ia halahi morot sian luat ni halahi i.

¹³ Tapi anggo halak na maringanan di Gesur dohot Maaka nada diusir angka halak Israel; laing maringanan di Israel do halahi.

¹⁴ Anggo Marga Levi nada manjagit tano parbagian sian si Musa. Madung didokkon Tuhan humani tu si Musa, anggo bagian ni Marga Levi, i ma na sian haul na nitutung di langgatan baen di Tuhan Debata ni Israel.

Luat na ditontuhon di Marga Ruben

¹⁵ Deba sian tano na nijanjihon ni Tuhan i tu halak Israel, madung dilehen si Musa tu Marga Ruben.

¹⁶ Lalu do tano ni halahi tu Aroer (na di topi ni Batang aek Arnon) dohot kota na di tonga-tonga ni rura i lopus tu napa na gincat sudena na humaliang Medeba;

¹⁷ songon i muse Hesbon dohot angka kota na di napa pardolok i sude, i ma: Dibon, Bamot-Baal, Bet-Baal-Meon,

¹⁸ Jahas, Kedemot, Mefaat,

¹⁹ Kiryataim, Sibma, Zeret-Hasahar na di ginjang ni tor na di rura i,

²⁰ Bet-Peor, angka robean ni Dolok Pisga dohot Bet-Jesimot.

²¹ Dohot muse dope sude angka kota na di napa pardolok dohot sude luat na nirajaan ni si Sihon raja ni halak Amori na maringanan di Hesbon najolo i. Ia pe dohot angka na markuaso di Midian, i ma: Si Ewi, si Rekem, si Zur, si Hur dohot si Reba na dung talu do sudena dibaen si Musa. Sude angka parkuaso i na jungada do mamarenta luat i baen di Raja Sihon.

²² Sian tonga-tonga ni angka jolma na dibunu ni bangso Israel i, dohot ma disi si Bileam anak ni si Beor partondung i.

²³ Batang aek Jordan ma songon batas ni Marga Ruben sabola Hasundutan. Angka i ma kota dohot luat na dilehen tu marga-marga na sian horong ni si Ruben baen tano bagian ni halahi.

Luat na ditontuhon baen di Gad

²⁴ Deba sian tano na nijanjihon ni Tuhan tu halak Israel i madung dilehen si Musa tu angka marga-marga na sian horong ni Gad, baen bagian ni halahi.

²⁵ Masuk tu bagian ni halahi do Jaser dohot sude kota na di Gilead dohot satonga sian luat ni bangso Amon marbalok di Aroer na di Habincaran ni Raba;

²⁶ luat na sian Hesbon lopus tu Ramat-Mispah dohot Betonim, dohot luat na sian Mahanaim lopus tu parbatasan ni Debir, masuk tu luat ni Marga Gad ma sudena i.

²⁷ Di Rura Jordan masuk dope tu bagian ni Gad, Bet-Haram, Bet-Nimra, Sukot dohot Zafon, i ma luat na tinggal sian na nirajaan ni Raja Sihon na sian Hesbon. Parbatasan bagian sabola Hasundutan ni luat ni Gad, i ma Batang aek Jordan lopus tu Dano Galilea di Utara.

²⁸ Angka i ma kota dohot luat na dilehen tu angka marga na sian horong Gad, baen tano bagian ni halahi.

Luat na ditontuhon di Habincaran baen di Manase

²⁹ Deba sian tano na nijanjihon ni Tuhan tu halak Israel i, madung dilehen si Musa tu angka marga na sian horong Manase satonga, baen bagian ni halahi.

³⁰ Lalu tu Mahanaim angka parbatasan ni halahi, masuk ma sude Basan – i ma sude luat na nirajaan ni si Og, raja ni Basan, songon i muse onom pulu huta ni Jair di Basan.

³¹ Masuk muse dope satonga sian tano Gilead, dohot Astarot dohot Edrei, i ma sidua kota sabungan ni luat na nirajaan ni Raja Og di Basan. Dilehen sude luat i tu satonga marga na sian pomparan ni si Makir anak ni si Manase.

³² Songon i ma dibaen si Musa marbagi tano na di Habincaran ni Jeriko dohot Batang aek Jordan dompak di napa na di Moab ia.

³³ Tapi anggo Marga Levi nada mandapot tano hum saotik pe sian si Musa. Madung didok si Musa tu halahi, anggo bagian silehenon di halahi i ma, sian haul na nihaulkon tu Tuhan Debata ni Israel.