JOSUA 12 - BIBEL JAMITA NA DENGGAN

Angka raja na nitaluhon ni si Musa

¹ Anggo luat na di Habincaran ni Jordan, mamungka sian Rura Arnon manangkok tu Rura Jordan lopus tu tongtang ni Dolok Hermon di Utara, madung dirampas jana diingani angka halak Israel. Adong do dua raja na nitaluhon ni halahi.

² Sada ma i na margoar si Sihon, raja ni halak Amori na maringanan di Hesbon. Lalu do kuaso ni raja i tu Luat Gilead satonga: I ma sian Aroer (na di ujung ni Rura Arnon), dohot parsitongaan ni rura i lopus tu Batang aek Jabok na marbalok dohot luat ni bangso Amon;

³ songon i muse luat na di Habincaran ni Jordan sian Dano Galilea tu Selatan lopus tu Bet-Jesimot (di Timur Laut ni Laut Mate), lalu tu pat ni Dolok Pisga.

⁴ Raja na nitaluhon ni angka halak Israel muse, i ma Raja Og na sian tano Basan, na maringanan di Astarot dohot Edrei. Halak na tinggal sian bangso Refaim do ia.

⁵ Luat na nirajaannia dohot ma disi Dolok Hermon, Salka, sude Basan lopus tu Luat Gesur dohot Maaka; songon i muse tano Gilead satonga lopus tu luat na nirajaan ni Raja Sihon na sian Hesbon.

⁶ I ma raja sidua halak na nitaluhon ni si Musa rap dohot bangso Israel. Jana dilehen si Musa, naposo ni Tuhan i ma tano ni angka raja i tu Marga Ruben, Gad dohot satonga Marga Manase baen tano parbagianan ni halahi.

Angka raja na nitaluhon ni si Josua

⁷ Angka raja na nitaluhon ni si Josua rap dohot bangso Israel, i ma raja-raja na di Hasundutan ni Batang aek Jordan; sian Baal-Gad na di Rura Libanon torus tu Dolok Gundul di Selatan donok ni Edom. Dibagi-bagihon si Josua ma luat i tu angka marga-marga ni Israel baen bagian ni halahi.

⁸ Lalu do luat on lopus tu luat pardolok, luat na di pat ni dolok di sabola Hasundutan, Rura Jordan rap dohot angka robeanna i, angka luat na di pat ni dolok sabola Habincaran dohot halongonan na di Selatan. Luat i hian ma na niinganan ni bangso Het, Amori, Kanaan, Peris, Hewi dohot Jebus.

^9-24 Raja-raja na ditaluhon i ma angka raja na sian kota na mangihut on: Jeriko, Ai (na di lambung ni Betel), raja ni Jerusalem, Hebron, Jarmut, Lakis, Eglon, Geser, Debir, Geder, Horma, Arad, Libna, Adulam, Makeda, Betel, Tapuah, Hefer, Afek, Lasaron, Madon, Hasor, Simron-Meron, Aksap, Taanak, Megido, Kedes, Jokneam (na di Karmel), Dor (na di topi ni laut), Goyim (na di Galilea), dohot Tirsa, gabe tolu pulu sada raja ma sudena.