JOSUA 11 - BIBEL JAMITA NA DENGGAN

Talu Raja Jabin dohot donganna dibaen si Josua

¹ Lalu do angka barita taringot tu hamonangan ni Israel tu Raja Jabin na sian Hasor. Jadi gabe disuru ia ma halak mandapotkon Raja Jobab na sian kota Madon, songon i tu raja ni kota Simron dohot raja ni Aksap,

² tu angka raja ni kota na di pardolohan sabola Utara, di Rura Jordan sabola Selatan ni Galilea, na di pat ni dolok dohot na di luat partopi ni laut donok tu Dor.

³ Laing disuru Raja Jabin muse do halak mandapotkon halak Kanaan na di Hasundutan dohot Habincaran ni Jordan, tu angka halak Amori, Het, Peris dohot tu angka halak Jebus na di luat pardolohan, maradu tu angka halak Hewi na di pat ni Dolok Hermon na di Luat Mispa.

⁴ Jadi marroan ma angka raja-raja i rap dohot tentarana be na songon i bahatna jabat songon bahat ni horsik na di topi ni laut. Kudona pe dohot kareta porang ni halahi sun bahatna.

⁵ Dipasada angka raja-raja i ma tentara ni halahi jana rap ro lalu marmarkas di anak ni Batang aek Merom laho mamorangi Israel.

⁶ Didok Tuhan ma tu si Josua, “Ulang ho mabiar mida halahi. Ancogot laing songon on hatihana, ma pola Hubunu halahi sude hara ni Israel. Angkon mapangpang do baenonmu tentara ni halahi na markudo i, jana angka kareta porangna i angkon purunonmu.”

⁷ Jadi tompu ma diroro si Josua dohot sude parangannia musu i di anak ni Batang aek Merom.

⁸ Jana Tuhan do mambaen monang halak Israel maralohon halahi. Diporangi halak Israel halahi lalu dikojar lopus tu tongtang ni Misrefot Maim dohot Sidon di Utara, jana lopus tu Rura Mispa di Habincaran. Torus do jebu parporangan i lopus nada adong be na tinggal sian musu i. Umpe sahalak – mate sude.

⁹ Dipatulus si Josua do tu halahi na niparentahon ni Tuhan: Dipangpangi si Josua ma tentara ni halahi na markudo i jana ditutungi ia angka kareta porang ni halahi i.

^10-11 Dung i mulak ma si Josua, lalu ditaluhon ia Hasor, i ma na gumogo di hatiha i sian sude harajaan na adong disi. Disurbu ia kota i, dibunu ia raja dohot sude halak kota i; umpe sahalak dipadiar mangolu.

¹² Dirampas si Josua ma angka kota i sudena. Ditangkupi rajana i lalu dibunu, hombar tu parenta ni si Musa, naposo ni Tuhan i.

¹³ Tapi anggo angka kota na dipajongjong di ojahan na gincat, sada pe nada adong na nisurbu ni halak Israel, asing sian Hasor na nisurbu ni si Josua sandiri.

¹⁴ Dibunu sude jolma na maringanan di angka kota i, umpe sada halak dipadiar mangolu. Tapi anggo angka barang-barangna sigodang arga sudena dohot pahan-pahananna dibuat halak Israel do i gabe halahi puna.

¹⁵ Songon na niparentahon ni Tuhan tu si Musa naposoNa i, songon i do diparentahon si Musa tu si Josua, jana dipatulus si Josua do sude parenta i; sada pe nada adong na so dipadalan ia.

Luat na nirampas ni si Josua

¹⁶ Dirampas si Josua ma sandok luat – luat pardolok, angka luat na di pat ni dolok, bope na di Utara songon i na di Selatan; songon i Luat Gosen sudena dohot luat padang na harsang na di Selatan ni Gosen, dohot Rura Jordan.

^17-18 Bidang ni luat i, mamungka sian Dolok Gundul di Selatan donok ni Edom, lopus tu Utara lalu tu Baal Gad na di Rura Libanon, sabola Selatan ni Dolok Hermon. Honok sajo si Josua na marporang i dohot angka raja-raja i, tapi ditangkup si Josua do ujungna halahi jana dibunu ia sude halahi.

¹⁹ Sian sude kota na di luat i, sada kota pe nada adong na mambaen parjanjian mardame dohot Israel asing sian Gibeon kota ni bangso Hewi i. Sude kota na asing i talu di parporangan do.

²⁰ Dipajogal Tuhan do roha ni halahi laho marporang mangalo angka halak Israel, anso hona pusa halahi jana dibunu sude nada adong ampunanna. Songon i do parenta ni Tuhan tu si Musa.

²¹ Laing di hatiha i muse ma kehe si Josua mamusa bangso Anaki, i ma bangso raksasa na maringanan di luat dolok – i ma di Hebron, Debir, Anab dohot di sude luat pardolok Juda dohot Israel. Dibunu si Josua do halahi sude jana kotana i pe dironcohon.

²² Umpe sahalak sian bangso Anaki i na tinggal di Luat Israel; tapi anggo di Gasa, di Gat dohot di Asdod laing adong dope na tinggal piga-piga halak nari.

²³ Dirampas si Josua ma sude luat i songon na dung diparentahon ni Tuhan tu si Musa. Dung i dilehen ia ma luat i jana dibagi-bagihon tu bangso Israel gabe halahi puna; sabagian be ma ganop marga. Mantak muse ma bangso Israel na marporang i.