JOSUA 10 - BIBEL JAMITA NA DENGGAN

Talu halak Amori

¹ Tarbege ma tu si Adoni-Zedek raja ni Jerusalem na dung dirampas si Josua kota Ai jana dironcohon ia sude, jana dibunu ia rajana i songon na nibaennia maradopkon Jeriko dohot rajana i. Laing tarbege muse ma tusia bahaso na dung mardame angka halak Gibeon dohot halak Israel jana maringanan di tonga-tonga ni halahi.

² Tarancam situtu ma pangkilalaan ni halak na maringanan di Jerusalem, angke sarupa do godang ni Gibeon dohot angka kota na marraja; gumodang dope tehe sian Ai, jana angka halakna pe angka parporang na malo-malo do.

³ Jadi hara ni i gabe disuru si Adoni-Zedek ma halak tu Raja Hoham di Hebron, tu Raja Piream di Jarmut, tu Raja Jafia di Lakis, dohot tu Raja Debir di Eglon maroban tona songon on,

⁴ “Ro ma hamu mangurupi au mamorangi Gibeon, dibaen madung mardame halak Gibeon dohot si Josua dohot angka halak Israel.”

⁵ Jadi gabe mardomu ma raja ni halak Amori na lima i, i ma raja ni Jerusalem, Hebron, Jarmut, Lakis dohot Eglon rap dohot sude tentarana be, lalu dihobuk halahi ma Gibeon mamorangisa.

⁶ Dipalalu halak Gibeon ma barita on tu si Josua di parbandaran na di Gilgal, “Urupi ma hami tuannami, palua ma hami! Ulang padiar hami! Ro ma tuan i mangurupi hami. Dibaen madung mardomu tentara ni sude angka raja ni Amori na di luat pardolohan mangalo hami!”

⁷ Dung i kehe ma si Josua rap dohot sude tentarania, dohot angka parangan na dumenggan sian Gilgal laho marporang.

⁸ Jana didok Tuhan ma tu si Josua, “Ulang ho mabiar tu halahi. Madung Hulehen di ho hamonangan, hara ni i umpe adong sahalak na tarbaen tahan mangalo ho.”

⁹ Saborngin i torus ma si Josua dohot parangannia i mardalan sian Gilgal tu Gibeon, lalu ompot ma diroro halahi halak Amori i.

¹⁰ Dibaen Tuhan ma halak Amori i gabe mabiar so martontu, dung diida halahi halak Israel. Bahat do halak Amori na hona bunu di Gibeon i jana angka na mangolu i dope dikojar ma manuati lereng ni dolok na di Bet-Horon lalu tu Aseka dohot Makeda na di Selatan.

¹¹ Jadi taran na maporus i halak Amori sian jolo ni tentara Israel, didabuhon Tuhan ma ambolas na godang-godang sian langit tu ginjang ni halahi salolot di dalan i lalu tu Aseka. Umbahat dope na mate dibaen ambolas i sian na hona bunu ni halak Israel.

¹² Di ari i, di na nilehen ni Tuhan hamonangan tu halak Israel maradopkon halak Amori, mangkuling ma si Josua tu Tuhan. Jana di adopan ni halak Israel didok si Josua ma, “O, mataniari! Maradian ma ho di ginjang ni Gibeon. Jana ho, bulan! Ulang ho morot sian ginjang ni Rura Ayalon.”

¹³ Mataniari pe maradian ma jana bulan i pe nada morot lopus talu dibaen halak Israel sude angka musuna. Tarsurat do na masa on di Buku Jasar. Sadari maningting nada lusut mataniari, tapi maradian di parsitongaan ni langit i.

¹⁴ Nada jungada tarjadi songon i jana indangkan na tarjadi muse be ari songon i, disi diihutkon Tuhan hagiot ni jolma, marporang Tuhan di pihak ni Israel!

¹⁵ Dung sidung porang i, mulak ma si Josua rap dohot angka tentarania i tu parbandaran na di Gilgal.

Ditangkup si Josua lima halak raja ni Amori

¹⁶ Tapi anggo raja ni Amori silima halak i luncat do jana martabuni di bagasan sada liang di Makeda.

¹⁷ Dung i adong ma halak marnidasa jana dipaboa ma tu si Josua salaho tu inganan partabunian ni halahi i.

¹⁸ “Gulang hamu ma batu na godang-godang tu baba ni liang i jana dibaen pangawal manjagoi disi,” ning si Josua,

¹⁹ “tapi ulang maringanan disi. Kojar hamu ma torus musu i jana sian pudi ma diporangi halahi; ulang nipaloas halahi masuk tu angka kota ni halahi! Madung dilehen Tuhan Debatamu hamonangan tu hamu maralohon halahi.”

²⁰ Dibunu si Josua dohot angka halak Israel i ma angka halak Amori i, tapi laing adong dope sian tonga-tonga ni musu i na bisa masuk jana martabuni di angka tembok ni kota ni halahi gabe nada hona bunu.

²¹ Dung i mulak be ma angka parangan ni si Josua mandapotkon si Josua di parbandaran na di Makeda. Umpe sada jolma di luat i na puluk mandok sanga na aha laho mangalo halak Israel.

²² Dung salpu i didok si Josua ma, “Saonnari buka hamu ma baba ni liang i jana oban hamu tuson raja silima halak i.”

²³ Jadi dibuka ma liang i lalu diboan ma ruar angka raja ni Jerusalem, Hebron, Jarmut, Lakis dohot Eglon

²⁴ jana dioban ma i tu si Josua. Dung i dipiohon si Josua ma sude halak Israel marlagut. Dung i diparentahon si Josua ma anso marroan angka panglimania na rap kehe marporang dohot ia mandegei pangkal ni rungkung ni raja-raja i. Jadi dipatulus angka tentara i ma songon i.

²⁵ Dung salpu i, didok si Josua ma tu angka panglimania i, “Ulang hamu mabiar jana ulang gamang. Angkon pos rohamunu jana barani, angke songon on ma baenon ni Tuhan sude angka musumunu.”

²⁶ Lalu dibunu si Josua ma angka raja i digantung ia halahi di lima bona ni hayu. Dipadiar do disi bangkena i lopus borngin.

²⁷ Dung lusut mataniari, diparentahon si Josua ma, gabe dipaijur bangke i lalu disampakkon tu bagasan liang i, na nipake ni angka raja i hian inganan partabunian. Dung i dibaen ma batu na godang-godang di baba ni liang i. Lopus saonnari laing disi dope angka batu i.

Ditaluhon si Josua dope umbahat luat ni Amori

²⁸ Di ari i, diporangi si Josua ma Makeda lalu ditaluhon ia rap dohot rajana i. Dibunu ia sude halak na adong di kota i; umpe sada halak na dipadiar mangolu. Laing songon na nibaen ni si Josua tu raja ni Jeriko do dibaen ia tu raja ni Makeda.

²⁹ Dung i dipatorus si Josua dohot angka tentarania ma sian Makeda tu Libna jana diporangi Libna.

³⁰ Maradopkon kota on pe dohot rajana i, dilehen Tuhan do hamonangan di angka halak Israel. Umpe sahalak na dipadiar mangolu; sude na sakota i dibunu. Songon na nibaen ni halahi tu raja ni Jeriko, laing songon i do dibaen halak Israel tu rajana i.

³¹ Dung i kehe muse ma si Josua dohot tentarania i sian Libna tu Lakis. Jolo dihobuk halahi do kota i lalu diroro.

³² Dilehen Tuhan do hamonangan tu halak Israel maralohon Lakis di bagasan parporangan di ari paduahon. Laing songon na nibaen ni halahi di Libna do dibaen halahi di Lakis; umpe sahalak dipadiar mangolu, sude do dibunu.

³³ Ro do si Horam raja ni Geser mangurupi Lakis, tapi ditaluhon si Josua do ia dohot tentarania i; umpe sahalak tading, sude do mate.

³⁴ Mangihut ma muse sian Lakis kehe ma si Josua dohot tentarania i tu Eglon lalu dihobuk halahi ma Eglon jana diroro.

³⁵ Laing di ari i do dapot halahi kota i lalu dibunu sude halak na disi songon na nibaen ni halahi di Lakis.

³⁶ Sian Eglon, manangkok ma si Josua dohot angka tentarania i tu dolok mandapotkon kota Hebron, mamorangi kota i

³⁷ lalu mambuatsa. Hona bunu ma sudena rajana dohot sandok halak na adong di kota i dohot di angka kota na asing na humaliang kota i. Dironcohon si Josua do sandok kota i laing songon na nibaennia maradopkon kota Eglon. Nada adong umpe sahalak na dipadiar mangolu disi.

³⁸ Dung i, mulak ma si Josua dohot tentarania i lalu kehe mamorangi Debir.

³⁹ Dibuat si Josua ma kota i dohot rajana maradu sude angka kota na asing na humaliang i. Hona bunu do sude jolma na disi. Songon na nibaen ni si Josua tu Hebron dohot Libna maradu rajana i, laing songon i do dibaen ia tu Debir dohot rajana i.

⁴⁰ Dipatunduk si Josua sude luat i. Ditaluhon ia angka raja na di bagian pardolok, na di robean ni dolok sabola Habincaran, na di pat ni dolok sabola Hasundutan, songon i muse na di angka padang-padang sabola Selatan. Sada halak umpe dipadiar ia mangolu; sude do dibunu. Songon i do antong parenta ni Tuhan, Debata ni Israel.

⁴¹ Mangararati do parporangan na nipimpin ni si Josua i mamungka sian Kades-Barnea na di Selatan lalu tu Gasa na di lambung ni topi ni laut, masuk ma i dohot sude Luat Gosen torus tu Utara di Gibeon.

⁴² Di bagasan sada parporangan sajo, madung talu sude raja-raja i dohot luat na nigomgoman ni halahi dibaen si Josua, angke Tuhan Debata ni Israel do marporang di Israel.

⁴³ Dung salpu i, mulak ma si Josua dohot tentarania i tu parbandaran na di Gilgal.