JOEL 2 - BIBEL JAMITA NA DENGGAN

Sipaingot salaho tu ari ni Tuhan na giot ro i

¹ Palu ma sarune di Sion jana marsurak ma di dolok ni Debata na badia i. Humitir ma sude pangisi ni luat angke dapot ne ma ari ni Tuhan, angke madung donok ari i.

² Manggolap do ari i jana mangalomlom, ari na gok ombun dohot hagolapan. Songon sinondang ni mataniari manyogot di ginjang ni angka tor, sada bangso na bahat jana na gogo. Na so unjung masa dope i; jana sapanjangna nada masa be i.

³ Dijolona api na manutung jana mambaen marmosohan dipudina gara ni api nada mar na mintop. Tano na dijolona songon kobun Eden, tapi dipudina songon halongonan na gariang jana nada adong na malua.

⁴ Tudos tu kudo do rupana; songon kudo porang parlojongna.

⁵ Muda mangalumpat-lumpat halahi di partoran, sorana i suman tu pargaruntang ni kareta di porang, jana songon parsesek ni api na marjilam-jilam, na manutung durame. Marbaris do halahi songon parangan na gogo-gogo, na dung hobas kehe marporang.

⁶ Muda mandonok halahi, sude halak mabiar, sude tompana langan jana lombam.

⁷ Songon ulubalang do halahi na kehe tu porang, jana mandangkit tembok songon na garang. Marbaris halahi tigor tu jolo an, nada marbelok sanga na marampalan.

⁸ Nada marsisosahan halahi, mardalan be do halahi tu barisanna sandiri. Maradu ribur halahi mangonjar partahanan, barisan ni halahi nada haambatan.

⁹ Manyaroso do halahi tu bagasan kota, jana marlojong di ginjang ni tembokna. Mandangkiti do halahi tu angka bagas, masuk sian jandela halahi songon panangko.

¹⁰ Humutur do tano di na maju halahi, dohot langit pe humuntal do disi. Manggolap dohot bulan songon i mataniari, nada marsinondang dohot angka bintang i.

¹¹ Mangaronggur ma sora ni Tuhan mangalehen tanda, jana tunduk do tuSia parangan i sude. Na bahat do paranganNia! Santak gogo ni tentara na nipimpinNa! Ari na godang jana na jorbut do ari ni Tuhan! Ise he na bisa mangambati i?

Soso-soso tu haubaan ni roha

¹² Didok Tuhan ma, “Tapi anggo saonnari, sian sandok roha mulak ma tu Au mangulahi, lalu puaso, tangis jana marsak.

¹³ Sibakkon ma rohamu tapi ulang dohot pakeanmu.” Mulak ma hamu tu Tuhan Debatamu mangulahi; paribo roha do Ia jana sai mangkaholongi. Parsobar do Ia jana na ingot di janji, jop rohana mangampuni jana nada ra mamparkanciti.

¹⁴ Betak na muba do tehe roha ni Tuhan Debatamu, jana marlobi-lobi pasupasuNa di hamu. Gabe tarbaen hamu manghaulkon tu Tuhan, haul anggur dohot gandum.

¹⁵ Ombus ma sarune di Sion, di dolok ni Debata, parentahon rayatmi anso marpuaso; patupa muse sada ari na godang parpunguanna.

¹⁶ Palagut ma sandok bangso i, parade ma tu parpunguan godang halahi. Oban muse ma angka na tobang-tobang, angka dakdanak maradu na niompaan. Na baru tu bagasna pe sude na mardohotan. Suru halahi manadingkon bagasna.

¹⁷ Angka malim na manghobasi di Bagas Ni Tuhan, di antara ni langgatan dohot emper parjolo an, tangis jana mangandungi di jolo ni langgatan jana didok ma, “Haholongi ma ale Tuhan, bangsoMon ulang padiar bangsoMon marlayas jana diparkanciti, jana gabe siincahan ni angka bangso na asing. Biasi sai didokkon halak di tonga-tonga ni angka bangso, ‘Di dia do Debata ni halahi?’ ”

Mulak napu tano i dibaen Debata

¹⁸ Jadi mangulahi ma dipareso Tuhan tanoNia i jana dihaholongi Ia bangsoNia.

¹⁹ Dialusi Ia ma halahi, songon on didok Ia, “Saonnari Hulehen ma di hamu sude: gandum, anggur dohot miak zetun baen panganonmunu be, anso sude hamu gabe butong be. Nada padiaronKu marlayas hamu sanga sipartataan ni angka bangso.

²⁰ PaorotonKu ma parangan ni siapor na sian Utara, tu padang parhorsihan Huayak deba. Tu Laut Hamatean Husosak barisan parjolona, tu Laut Tonga Huonjar parpudina. Muap bau angka bangkena, Hara ni na mamparkanciti hamu, Humatehon i sudena.

²¹ Ulang mabiar, ale ladang, pasonang ma rohamu; ingot ma denggan ni roha ni Tuhan tu hamu!

²² Ulang hamu marsak, ale angka binatang. Saonnari madung mulak mangarata angka padang. Angka hayu ramos be marbatui, batu ni anggur dohot ara marhimpal marlobi-lobi.

²³ Ale rayat ni Sion, marjop ni roha ma hamu! Marmoga-moga jana marsurak-surak ma hamu, hara ni sude denggan basa na sian Tuhan Debatamu! Di hatiha musim gugur tuk dilehen Ia udan di hamu. Di musim ngali diduruskon Ia udan, dohot di hatiha ni sabion laing songon na salpu.

²⁴ Jadi marisi gandum mangulahi pardegean; anggur dohot miak zetun marsabur-sabur di panggilingan.

²⁵ GontionKu ma sude angka taon-taonmu, i ma angka suhana. Na dung abis dibaen siapor, siapor na sompor na pangabiskon, tantarangKu na bahat na Hulehen tu tonga-tongamunu.

²⁶ Tuk ma sipanganon di hamu, nada be sai malean, pujionmunu ma mangulahi Debatamunu, Tuhan, angke dibaen Ia do di hamu bahat hahomangan. Indada gabe sihata-hataan ni halak be bangsongKi!

²⁷ Jadi botoonmunu ma ale Israel, na di tonga-tongamunu do Au, jana Au do Tuhan Debatamunu. Nada adong Debata na asing be, olat ni Au sandiri. Nada pailaon be bangsongKi salolot-lolotna!”

Ari ni Tuhan

²⁸ “Dung salpu i sude, usehononKu ma tondingKu tu sude jolma. Jadi manyurirangi ma angka anak dohot borumunu, marnipi ma angka na ma tobangmunu maruli parnidaan ma angka naposobulungmunu.

²⁹ Laing usehononKu muse ma tondingKu dihatiha i tu angka hatobanmunu, dadaboru sanga halaklahi.

³⁰ PamasaonKu ma angka hahomangan di langit dohot di tano on: Mudar, jilam ni api dohot timus na marsijongjong.

³¹ Manggolap ma mataniari jana bulan pe marrara songon mudar dompak so dapot ari ni Tuhan i, i ma ari na godang jana sihabiaran!

³² Anggo di hatiha i, dapotan haluaan ma sanga ise na mangido pangurupi ni Tuhan i. Harana di Dolok Sion dohot di Jerusalem giot adong ma haluaan songon na nidok ni Tuhan; sude halak na mamiohon goar ni Tuhan, i do na giot dipalua.”