JOEL 1 - BIBEL JAMITA NA DENGGAN

¹ On ma tona ni Tuhan tu si Joel anak ni si Petuel.

Marsak halak Israel hara ni na abis suan-suanan di ladang di papangani siapor

² Hamu angka na tobang-tobang, tangihon hamu ma; parrohahon ma sude hamu pangisi ni luat on! Unjung dehe tarjadi songon on di hatihamunu sanga dompak di ngolu ni angka ompumunu?

³ Caritohon hamu ma na masa i tu angka dakdanakmunu; anso dipalalu halahi muse tu dakdanakna caritomunu i. Sundut na mangihut pe angkon botoonna muse, jana paudutonna tu sundut na di pudina be.

⁴ Punguan ni siapor na so taretong bahatna, songgop di ladang mamangani suan-suananna. Sanga aha na tading dibaen punguan na sada, abis muse ma i dipangan na di pudina.

⁵ Ngot ma, o angka parmabuk jana tangis ma hamu! Tangis ma hamu ale angka parminum anggur na baru, angke madung dirampas anggur i sian pamanganmunu!

⁶ Ro do parangan ni angka bangso laho mamorangi tanongku; na gogo jana nada habilangan bahatna; iponna pe tajom songon ipon ni singa jara-jara, jana saitna songon sait ni singa boru-boru.

⁷ Disegohon halahi do bona ni anggurta, bona ni ara pe diabiskonsa. Disangkuliti halahi bonana, gabe mamontar angka dangkana.

⁸ Tangis ma hamu, songon anak boru na marsak roha na tangis hara ni na matean tunangan haholongan ni rohana.

⁹ Ma pola abis gandum dohot anggur sudena nada adong be sihaulkonon di Bagas Ni Tuhan. Gabe marsak ma angka malim, dibaen nada adong be haul di Tuhan.

¹⁰ Tarulang angka ladang jana marhancit, hauma pe marsak boti sai susa; dibaen gandum madung sude, mahiang bona ni anggur umpe marbatu be, miak pe ma giot abis.

¹¹ Angka partani gabe maila parkobun anggur pe tama tangis! Angke mangabis gandum dohot eme darat taru hais, jana parbatu sibuaton pe madung dangis.

¹² Bona ni hayu sipanganon di padang gabe mahiang sudena: bona ni anggur, ara, appel, kurma dohot dalimo, gabe mago ma tata jop ni roha, limpot ma sian bangso i jop ni roha.

¹³ Hamu ale angka malim na markobasi di langgatan, pake hamu ma abit goni anso martangisan. Masuk ma tu Bagas Ni Tuhan marbornginma laho mangandung disi, angke nada adong be haul anggur dohot gandum.

¹⁴ Parentahon bangsomi anso puaso, patupa hamu ma sada ari parpunguan bolon! Ontang ma angka pamimpin maradu hatobangonna maradu sude angka na maringanan di luat on, anso marroan tu Bagas Ni Tuhan Debata, laho martangiang jana pio-pio mangido tolong tuSia.

¹⁵ Nada sadia honok nari ari ni Tuhan dapot ne ma, disi ma hatihana Na Markuaso i parohon mara. Na jorbut sun do ari i dibaen maroban arsak dohot hasegoan do i.

¹⁶ Di na abis sipanganonta, manatap sajo ma hita, gogo soada. Nada jumpang be jop ni roha di Bagas Ni Debatanta.

¹⁷ Di tano na harsang, same marmatean. Nada adong be gandum na nisimpan. Rumar talobat gabe marlohaan.

¹⁸ Marngiak pahan-pahanan; jana gaor angka lombu angke nada adong be ruput pajampalanna; songon i dohot biri-biri gabe tarsonggot.

¹⁹ Tu Ho do au mangido tolong ale Tuhan, angke langa do padang na harsang jana halongonan; angka hayu pe mahiang marmatean mosok songon na niapian.

²⁰ Salang binatang riar pe angka na di harangan, pio-pio do tu Ho mangido partolongan. Nada be margogo halahi pasombu nguasna, angke mahiang do angka batang aek sasudena.