JOB 8 - BIBEL JAMITA NA DENGGAN

Si Bildad

^1-2 “Sadia honok nari sai dohononmu songon i? Sai songon parngongos ni alogo do pandohanmi.

³ Na so unjung do dipageduk Debata hatigoran; na so jungada sial pajongjong habonaran.

⁴ Betak na mardosa do angka dakdanakmu tuSia, jadi na patut do halahi hona uhumNia.

⁵ Tapi muda tuSia do ho marsilaung, mangido ibo ni roha jana mangido ampun.

⁶ Muda tigor do rohamu, so mardais sala, manigor tolongon ma ho tolongon ni Debata. LehenonNia ma tu ho na denggan pamalosna, jana mangulahi sonang bagasmu baenonna.

⁷ Nada sadia i, sinadonganmu na mago martimbangkon sijagitonmu di na ro.

⁸ Halak na daulat di na robi, ingotonmu do nian sugari, jana sihiranmu pangalaman ni angka ompu di na robi.

⁹ Pendek do hita mangolu, so ada taboto sanga aha, hum songon halinu sajo do da ari-arinta.

¹⁰ Tangihon ma da pandok ni halak na daulat najolo, na mangalehen sipodaon on tu ho,

¹¹ ‘Di aek-aek do tubu galoga; di tano na bornok do tubu ia.

¹² Muda mahiang aek i, marhancit ma galoga i, tumibu sian duhut na asing i. Hape nian laing loyok jana so dapot dope tingkina, nirabi mambuat hagunaanna.

¹³ Songon i ma da halak na so marTuhan. Lupa ia tu Debata, gabe mago ma pangaropan.

¹⁴ Sada bonang na gale do dipangasahonsa, hape sabonang ni tamboung do godangna.

¹⁵ Margogo ma he bonang i baen parsigantungan? Tahan ma he bonang i baen sitiopan?’

¹⁶ Songon ri di padang, songon i do da halak na so marTuhan, muda hona sidumadang ari, manjarampak ia manggohi parladangan.

¹⁷ Manjarampak mangalilit uratna i tu batu na di tano, gomos togu pangarahutna.

¹⁸ Tapi saonnari cubo ma umpat ri i, gabe songon na so unjung do ia disi, jana didok ia ma: ‘Nada unjung huida ho!’

¹⁹ Olo da, hum songon i sajo ma i hasonangan ni parjahat; ro ma halak na asing jana manggontihonsa.

²⁰ Hape anggo halak na setia, nada unjung ditadingkon Debata, jana muse nada jungada mangurupi tu halak na so hasaya.

²¹ BaenonNia ma pamanganmu martata, bibirmu marmoga-moga,

²² mambaen maila jana marenek roha na magigi tu ho, bagas ni parjahat gabe sisoada disego-sego.”