JOB 6 - BIBEL JAMITA NA DENGGAN

Si Job dohot angka dongannia

^1-2 “Sugari nitimbang dokdok ni pardangolan dohot paruntungan, pasti umborat sian horsik na di topi laut an.

³ Jadi, ulang homang ho muda salpu hata pandohan gabe hurang martontu.

⁴ Hona tombus ni anak ni pana do pamatangku dibaen Pargogo Na Sumurung i. Manyarira rasunna i tu sude pamatang i. Na sun jebu ni Debata tarlobi sogen sihabiaran, jana manjombai iba songon dia ma parro ni musu marparangan.

⁵ Sombu do roha ni halode muda nilehen ruput na lomak, laing songon lombu muse muda nilehen sipanganonna.

⁶ Tapi anggo sipanganon na hambar ise ma he giotsa? Bia ma pambaenna mardai na bontar ni pira?

⁷ Hum dais tusi pe nada ra au, gialan do au muda mangankonsa.

⁸ Biasi ma he nada ra Debata manangihon tangiangniba? Biasi ulaning mangarohai Ia tu pio-pioniba?

⁹ Sugari ra ma nian Debata mangaropuk iba! Sugari tompu ma au dibunu Ia!

¹⁰ Songon siriburan do di au na songon i, na giot-giot manortor noma au di pardangolan i, harana sandok parenta ni Debata Na Sun Ias i, huoloi jana huparate-atehon do i.

¹¹ Aha ma he gogongku umbaen na laing adong au? Aha dope siaropon ni roha lumolot iba mangolu?

¹² Na songon pir ni batu ma he badan simanare on? Na sian tumbaga ma he lakna pamatang on?

¹³ Abis noma da gogoniba manjalahi haluaon, jana nada adong be na bisa manolong iba?

¹⁴ Di sitaonon na songon on, hupasahat noma ale-ale na solkot on. Sanga na hot dope au di haburjuon sanga pe na dung humuduk sian Na Sun Kuaso.

¹⁵ Tapi anggo hamu ale dongan, na so tarpangasahon jana na so haposan. Songon batang aek na hiangan, di hatiha ari halogoan.

¹⁶ Na songon batang aek na hohom do hamu hohom mangunong, dibaen tartutup ambolas dohot batang aek na mangimpal.

¹⁷ Disi dapot logo ni ari, mago ma ambolas dohot es so marpartinggal. Ondolan ni batang aek gabe talanjang, mahiang jana mangkarogang.

¹⁸ Di na manjalahi batang aek lilu angka pardalan-dalan; madang-adang halahi jana mate di parhorsihan.

¹⁹ Na mardalanan sian Seba dohot na sian Tema, jalak-jalak di batang aek i jana mararop roha.

²⁰ Hape sayang boti arop ni rohana i di topi batang aek na so maraek i.

²¹ Songon batang aek i ma da ho, ale dongan; sumurut ho jana mabiar mida iba di pardangolan.

²² Biasi? Adong he hupangido bagi aha tu ho? Sanga husuru sogohonmu halak tu haporluanku?

²³ Adong he hupangido nipalua, sian musu na so maribo roha?

²⁴ Antong, ajari ma au, patudu hasalaanku! Hupahohom pe jana hutangihon pandohanmu.

²⁵ Hata na ias palambok roha, hape hata na rumar do kecetmu, na so marguna!

²⁶ Songon alogo sajo dietong ho hatangku! Nada marguna maralus ho tu au na mandele.

²⁷ Salang bagian na so marama pe laing dirohai ho, dikilang ho dohot ale-alemu anso tibu makayo ho.

²⁸ Ligi pe da tu au. Tu ho ma he margabus au?

²⁹ Ulang ho mambaen na geduk, boto ma! Ulang au pasala, tutu do nada au sala.

³⁰ Adong he diambang ho margabus au, nada tarbaen paasing na denggan dohot na jat?