JOB 5 - BIBEL JAMITA NA DENGGAN

¹ Pio-pio ma jolo ho Job, adong dehe alus na ro? Sian angka na badia do pangurupi dipangido ho?

² Hum halak na bodo sun do na mate hara ni hancit ni rohana sajo.

³ Unjung huida jolma na bodo; idaon ngoluna songon na hot do. Hape ompot na so niambang huburai inganannia tinggal.

⁴ Gabe so unjung dapotan pangondian dakdanakna; nada adong halak na ra mambela parkarona.

⁵ Sanga aha na nisabi ni halahi di ladangna, abis dipapangani halak na marumar butuhana, salangkan gandum na di tonga ni sihupi, sun digugut jolma na malean i. Sinadongan dohot hamoraanna gabe sirohaan ni halak parroha arta.

⁶ Nada sian portibi ruar hajahaton, nada sian tano ro ni hasusaan.

⁷ Nada! Tapi sian jolma sajo do, na mangalapi tu dirina hamamagona, na songon gurasa na mamuretek sian apina.

⁸ Sugari songon ho au, dohononku ma tu Debata, aduhononku noma tuSia, jana dipasahat parkaroniba.

⁹ Na godang ma da pambaenan ni Debata; nada tuk gogoniba mangastuisa. Angka hahomangan dibaen Ia, na so tarbilang jana na so marujung.

¹⁰ Diparo Ia udan tu tano, mandurus ladang mambornok padang.

¹¹ Ia ma da Debata na patugincatkon halak na menek, na pamogahon na dangol niandung.

^12-13 Dipaudut ia sangkap ni halak na bisuk, tardapot, tartangkup dibaen ia halak na lingkas, gabe sundat sude tahi ni halahi, tarpaoto dalanna dibaen akalna sandiri.

¹⁴ Dapot manggolap halahi di tonga ari, gapa-gapa songon di golap ari.

¹⁵ Hape dipalua Debata do nian: Halak na pogos sian hamatean, halak na menek sian dondonan.

¹⁶ Hape saonnari adong ma arop ni roha, di halak na so marnampuna. Jana parjahat manguntam mangkohom, angke Debata do mambaen hohom.

¹⁷ Na dohar ma da ho muda Debata manggorahon ho, ulang mandele muda Ia pasala ho.

¹⁸ Angke Debata do mambaen marhancit, Ia muse do na mangubati, jana tanganNia do mamukuli, laing songon i na pasuang mangulahi.

¹⁹ Muda ro mara pangondam, sai na marpupu do ho nipalua.

²⁰ Muda haleon ro manyosak, nada loason ho mate malean. Muda turtar porang manggasak, dao do ho sian hamatean.

²¹ Dijagohon do ho sian tilako dohot jajangan. Taradopi ho do arsak so marhabiaran.

²² Di na mangararati pe hajahatan dohot haleon, sabam rohamu jana laing masa partataan. Nada mabiar rohamu jana sak, mangadopi binatang panyoro jana na manggasak.

²³ Nada marbatu ladang na ni pangkurmu, binatang riar pe nada manjombai dirimu.

²⁴ Sai na sonang do ho maringan di undung-undungmu, jana muda paresoonmu biri-birimu, horas torkis do sudena, nada hurang di bagi aha.

²⁵ Pomparanmu so habilangan, sabahat ni ruput na di padangan.

²⁶ Songon eme na masak na nisabi di hatihana, ngolumu pe marudut lalu tu na saur matua.

²⁷ O, Job, na dung hami pareso do i sudena. Hata na tutu do i, jana jagit sajo ma.”