JOB 42 - BIBEL JAMITA NA DENGGAN

¹ Dung i dialusi si Job ma Tuhan i:

² “Huboto do, na marhagogoan do Ho mambaen bagi aha pe, jana nada jungada sundat sangkapMu.

³ Disapai Ho au sanga hara ni aha umbaen na puluk au manghagangguhon bisukMu, hape au sandiri nada hupaboto-boto salaho tusi. Huhatahon do angka pangalaho na so huboto, salaho tu angka pangalaho na tarlobi pahomang rohaniba on.

⁴ Disuru Ho ma au manangihon dompak mandok hata Ho, dohot mangalehen alus muda marsapa Ho.

⁵ Nabaruon dapot sian parbinegean do parbinotoanku tu Ho, tapi anggo saonnari adop mata do hutanda Ho.

⁶ Jadi gabe ila do rohangku paingot-ingot sude hatangku jana juguk di abu dohot orbuk do au manyolsoli rohangku.”

Panutup

⁷ Dung sidung manghobari tu si Job, mandok hata ma Tuhan tu si Elifas, “Muruk do au tu ho dohot tu donganmu na dua nari i, harana nada didok hamu pangalaho na satutuna i salaho tu diringKu. Hape anggo si Job naposongKi, nada songon i ia.

⁸ Antong anggo songon i, saonnari buat ma pitu lombu jantan dohot pitu biri-biri jantan lalu kehe ma hamu mandapotkon si Job. Dung i haulkon hamu ma i sudena gabe haul situtungon hara ni hamu sandiri. Tangiangkonon ni si Job ma salaho tu hamu jana jagitonKu ma tangiangnia i. Nada pola pailaonKu hamu haru pe nian na patut hamu manjagit uhuman. Nada didok hamu na satutuna salaho tu Au, hape anggo si Job didokkon ia do.”

⁹ Dipatulus si Elifas, si Bildad dohot si Sopar ma sanga songon dia na nidok ni Tuhan i, jana dijagit Tuhan ma tangiang ni si Job i.

¹⁰ Salpu i, dung martangiang si Job salaho tu donganna sitolu halak i, dibaen Tuhan ma ia mamora mangulahi jana dilehen tusia dua noli lompit sian sinadongannia najolo i.

¹¹ Marroan ma manopot si Job sude angkangnia dohot ibotonia maradu ale-alenia sude di hatiha na salpu, lalu rap marpesta ma halahi di bagasnia. Dipaboa halahi ma na dohot halahi marsak hara ni sude hasusaan na niparo ni Tuhan tusia jana diapoi halahi ma ia. Marsilehen ma halahi hepeng na sasadia be dohot tintin sada be tu si Job.

¹² Dipasupasu Tuhan ma si Job, maradu marlobi-lobi di angka ngolunia na tinggal i, lumobi sian dompak so masa sitaononnia i. Adong do opat bolas ribu bahatna hambeng biri-biri ni si Job, onom ribu untonia, dua ribu lombu dohot saribu halode.

¹³ Adong dope pitu halak anaknia dohot tolu halak borunia.

¹⁴ Borunia na godangna i dibaen ia ma goarna si Jemima, na paduahon si Kesia jana na menekna i si Kerenhapuk.

¹⁵ Di na saluat i nada adong bujing-bujing songon jeges ni boru ni si Job na tolu i. Dapotan bagian do halahi sian tean-teanan ni amangna sarupa dohot angka iboto ni halahi i.

¹⁶ Dung i laing mangolu dope si Job saratus opat pulu taon honokna; jadi laing jabat dope diida ia angka pahompunia maradu angka dakdanakna.

¹⁷ Jadi marujung ma ngolu ni si Job di na matobang situtu ia.